Hemen zaude: Hasiera › Herriz herri › Nafarroa › Albisteak › Iruñeko erdigunean gazteentzako aterpetxe bat egiteko aukera aztertu behar duen txostena eskatu du Nafarroa Baik

Iruñeko erdigunean gazteentzako aterpetxe bat egiteko aukera aztertu behar duen txostena eskatu du Nafarroa Baik

2011/09/07
Iruñeko erdigunean gazteentzako aterpetxe bat egiteko aukera aztertu behar duen txostena eskatu zuen, aurreko astelehenean, Aritz Romeo Nafarroa Baiko zinegotziak Herritarren Gaietarako Batzordean. Nafarroa Baik aurkeztutako eta Udalbatzak onartutako emendakin baten ondorioa da; ‘Caparroso txaletean’ aterpetxe bat jartzeko aukera mahaigaineratu zenean aurkeztu zuen bere emendakina Nafarroa Baik.

Koalizioko zinegotziak gogoratu duenez, “Nafarroa Baik aurkeztutako eta gero onartutako emendakinean jasotzen zenez, Caparrosoko txaleterako egindako txostenean ondorioztatuz gero bertan ezin dela gazteentzako aterpetxerik jarri, gehienez ere bi hilabeteko epean beste azterketa bat egingo da, hiriaren erdigunean kokatzeko aukera dagoen edo ez aztertzeko. Azterketa horretan, gainera, jasoko da eskaera erreala, azpiegitura hori koka daitezkeen eraikinak edota era horretako gazteentzako aterpetxeak eraiki ahal izatea errazteko egin beharreko arau aldaketa guztiak”.

Hala ere, Aritz Romeok salatu du oraindik ere ez dakitela UPNk Udalbatzaren akordio hori bete duen edo ez. Horregatik aurkeztu zuen galdera Nabaik, eta txostena egina egonez gero, kopia bat ere bai.

“Beharrezkoa eta lehentasunezkoa da Iruñeko erdigunean gazteentzako aterpetxe bat jartzea, gazteen turismoa erakartzen duelako; hau da, Udalaren egitekoa da azpiegiturak jartzea gazteak Iruñeara etorri ahal izateko. Hori ez da nahikoa, eta horrekin batera gazte politika egokiak garatu behar dira, gazteen parte-hartzearekin egindakoak, beraien ahotsa eta autokudeaketarako eta antolaketarako beraien gaitasuna aintzat hartuz”, esan du Aritz Romeok.

 

Amaitzeko, Romeok uste du era horretako azpiegitura bat jartzeko leku aproposena hiriaren erdigunea dela, “monumentuak eta turismoa gehien erakartzen duten arloak bertan daudelako, eta, aldi berean, gazteentzako aterpetxe batek, beti ere bere neurrian, Alde Zaharra biziberritzeko aukera eskaintzen duelako”.