Aralarrek Tolosaldean osasun pribatua inposatzea leporatu dio Jaurlaritzari

Eusko Legebiltzarreko Osasun batzordeko Aralarren bozeramaile Dani Maeztuk Eusko Jaurlaritzari leporatu dio “Tolosaldeko herritarrei eta udalei osasun pribatua inposatu izana”. Maeztuk, Aralarrek eta EAk elkarrekin aurkeztu duten legez besteko proposamenaren defentsan egin ditu adierazpenok. Bi taldeek moratoria bat eskatu dute Osakidetzak Asuncion klinika pribatuarekin arreta espezializatua emateko hitzarmenari dagokionean. Moratoria eskatzeaz gain, eragile guztiekin elkarrizketa mahaia eratzea eta lortutako akordioa Legebiltzarrera ekartzeko proposamena ere jasotzen zituen ekimenak.

Legez besteko proposamenaren aurka bozkatu dute EAJ, PSE eta Alderdi Popularrak. Dani Maeztuk sozialisten jarreraren aurka egin du batik bat. “Talde sozialistaren bozeramaileak mahai gainean jarri duen aitzakia sortak politikaren izen ona zikintzen du eta politika desideologizatu egiten du”, kritikatu du. “PSEk ideologia albo batera utzi du gai honetan ere, arreta espezializatua esku pribatuetan utziz”, gaineratu du Maeztuk. Legebiltzarkideak mahai gainean jarri du PSEk 2008an defendatzen zuen jarrera, “Tolosaldean osasun publikoaren alde egiten zuelako bakar-bakarrik”.

Aralarreko ordezkariak gogoratu du Asuncion Klinikarekin egindako hitzarmena azaroaren 15etik dagoela indarrean. “Egun horretatik, EAEn ere osasun arreta publikoa pribatizatzen da; ez da urrunago joan behar horren adibiderik izateko”. Maeztuk kontzertazioaren aurka Aralarrek daukan jarrera berretsi du batzordean, besteak beste, “kudeaketa pribatuari ateak irekitzen zaizkiolako eta horrek kontrol publikoa murrizten duelako. Horrela, diru publikoa oker kudeatzeari ateak irekitzen zaizkio eta arretaren kalitatea murrizteko arriskua dago”.