Gipuzkoako albisteak

Birzikla daitekeena ez errausteko Europako Parlamentuak onartutako ebazpenarekin bat egiteko eskatu die Aralarrek Batzar Nagusiei

Asier — 2012-05-25T09:53:54Z

Rebeka Ubera Aralarren batzarkide taldeko bozeramaileak esan duenez, “errausketa ardatz ez duten alternatibak egon badaude hondakinak kudeatzeko, ingurumen, ekonomia zein eragin sozial aldetik benetan bideragarriak direnak”. Horren aldeko apostu irmoa egin behar dela nabarmendu du, Gipuzkoari benetan irtenbidea eskainiz eta gure lurraldeko errealitatera egokituz. “Eta ez errausketa planteatuz, honek belaunaldietarako hipotekatzen gaituelako baita ekonomikoki ere, eta inongo irtenbiderik ez diolako emango hondakinen kudeaketari”.

Uberak gaineratu duenez, “atzo Europako Parlamentuan onartu zuten txostenak eta ekimenak agerian utzi du Gipuzkoan egin nahi duten errauskailuak ez daukala inolako zentzurik ez etorkizunik, Europatik etorriko den araudiak argi esango digulako hondakinen errausketarekin amaitu behar dela, batez ere birziklagarriak eta konpostagarriak diren gaiekin”.

Era berean, EAJ, PSE-EE eta PPren jarrera salatu du Uberak. “Hemen gogor ari dira Zubietako errauste-planta defenditzen, baina, aldi berean, beraien alderdikideek kontrako bidea dela zuzena esan dute Europako Parlamentuan, atzo onartutako ebazpenaren alde egin zutelako”.

Rajoyren murrizketak Gipuzkoan indarrean ez jartzea onartu dute BBNNek, Aralarren ekimenez

Asier — 2012-05-24T12:41:35Z

Bestalde, Aralarrek aurkeztutako beste bi mozio bere horretan onartuak izan dira Batzar Nagusietan. Horietako batean, joan den abenduan zerga-politika aldatzeko foru gobernuak hartutako bidean sakontzeko eskatzen zaio Aldundiari, “zerga-politika bidezkoa izan dadin, gehien dutenek gehiago ordainduz, eta zerga-bilketa handitzeko zerbitzu publikoak bermatzeko helburuaz”. Halaber, zerga-bilketaren jeitsiera aurreikusita, foru gobernuari defizit publikoa erabiltzea eskatzen zaion mozioa ere onartu da, beti ere Ongizate Estatua zabaltzeko beharrezkoak izango diren neurriak finantzatzeko.

Zaharren egoitzen itxaron zerrendari buruzko mozioa, ekonomia produktiboaren sustapenari zegokiona eta gizarte zerbitzuei zegokion mozioak ere onartuak izan dira, baina beste alderdi batzuekin erdibidetuta. Hala, egoitzetako itxaron zerrendak murrizteari dagokionean, Bildurekin eta PPrekin erdibidetutako mozioan, onartu da herrialdeko eskualdeek dituzten beharren inguruko ikerketa egitea; itxaron zerrendak murrizketeko izan diren aurrerapausoen inguruko informazioa ematea sei hilabetean; eta mendekotasunen bat duten pertsonak lehenestea.

Bestalde, Bildurekin erdibidetu da eta onartu da “enpleguaren sustapena eta mantentzea helburu izanik, ekonomia produktiboa indartzeko neurriak” hartzea eskatzen duen mozioa, alde batetik; eta bestetik, gizarte zerbitzuen mapa eguneratzea eta ezartzea eskatzen duen mozioa.

Aralarrek sei mozio aurkeztu dizkio Gipuzkoako foru gobernuaren programari

Asier — 2012-05-24T09:52:37Z

Rebeka Ubera Aralarreko batzarkide taldeko bozeramaileak azaldu duenez, asko izan zitezkeen foru gobernuaren programari aurkeztu ahal zitzaizkion mozioak, “baina nahiago izan dugu puntu konkretu batzuetan zentratu, pentsatzen dugulako gauden egoera ekonomikoan puntu horiek, nolabait, ardatz estratejikoak direla”. Guztira, sei izan dira Aralarren batzarkide taldeak foru gobernuaren programari aurkeztutako mozioak.

Zahar egoitzetako itxoite zerrenden arazoa konpontzeari bideratutakoa izan da horietako bat. “Badakigu agian ez dela une ekonomikorik egokiena arazo horri heltzeko, baina esperientziak erakutsi digu inoiz ez dela izango une egokia”. Aralarrek ez du eskatzen itxoite zerrendekin erabat amaitzea epe jakin batean, hori eskatu izan duelako aurreko legealdietan, eta onartu arren ez da ezer egin. “Gehiago eskatzen dugu norabide bat, konpromiso bat, sentsibilitate bat. Horregatik, proposatzen dugu legealdirako plana aurkeztea zerrenda horiek modu nabarmenean jeisteko eta espero dugu foru gobernuak erronka horri heldu egingo diola”. Zahar egoitzetara mugatu arren, filosofia berbera aplikatu daiteke gainontzeko zerbitzuetara ere zabal daitekeela azpimarratu du Uberak.

Zerga-politikari ere mozioa aurkeztu dio Aralarren batzarkide taldeak. “Bere momentuan eman zen urrats bat norabidea aldatzeko eta ontzat jo genuen, urrats gehiago emango zirelakoan. Beraz, pentsatzen dugu horri heldu behar zaiola. Eta ez da hainbeste politika fiskala gogortzea, baizik eta bere garaian foru gobernu neoliberalek sustatu zuten zerga-bilketaren jeitsierari buelta ematea, azken finean lehen zegoena berreskuratzea eta, noski, hobetzea. Eta hobetze horretan, zer esanik ez, indarra eman behar zaio gehien dutenek gehiago ordaindu behar dutelako kontzeptuari”.

Krisi ekonomikoari aurre egiten laguntzeko bi mozio aurkeztu ditu Aralarrek. Bata ekonomia produktiboa indartzeko neurriak jasoko dituen plana egin dezan Foru Aldundiak, batez ere enplegua sustatzeko eta mantentzeko. Bestean, proposatzen du inbertsio sozialen plana egitea. “Beti defendatu izan dugu ekonomia berpizteko planteatu ohi diren obra publikoak ez direla azpiegitura erraldoiak izan behar. Aitzitik, ekonomia eta enplegua berpizten lagun daitekeela inbertsioa sozialak eginez, obra publikoa bai, baina azpiegitura sozialetara zuzenduta. Modu horretan, enplegua sustatzen da, ekonomia sustatzen da eta, aldi berean, herritarren bizi kalitatean inbertitzen da horixe baita inbertsiorik onena”, esan du Uberak.

Defizit publikoaren aldeko beste mozio bat ere aurkeztu du Aralarren batzarkide taldeak. “Ez bereziki defizita gustatzen zaigulako edo ez zaigulako. Baizik eta pentsatzen dugulako nahiko murrizketa egin direla dagoeneko eta zorpetzea ezinbesteko ikusten dugulako horrek dituen arrisku guztiekin. Baina gauden egoeran, hau da, murrizketaren sindromepean, murriztu eta murriztu jarraitzen badugu benetako arriskua dugu ekonomia itotzeko”. Aralarren ustez, administrazio publikoak ausardiaz jokatu behar dute baita arlo honetan ere, agian sektore pribatuak ez duen ausardiaz.

Mariano Rajoyren Espainiako Gobernuak egindako murrizketak Gipuzkoan indarrean ez ipintzea eskatzen duen mozioa da Aralarrek aurkeztutako seigarrena. “Arrazoiak asko dira: murrizketak antisozialak direla eta, gainera, gure burujabetza apurraren kontrakoak direla”.

Ubera: “Hemen hitz eta pitz aritu beharrean, gauden egoera latz eta gogorrari aurre egiteko erantzunak emateko unea da”

Asier — 2012-05-23T08:15:00Z

Diskurtsoa osorik

Madrildik, Europatik zein merkatu neoliberaletik datozten murrizketei pase forala egitea eskatu dio Aralarrek foru gobernuari. “Zer egin behar du Foru Gobernu honek? Bide beretik jarraitu, hau da PP, PSE-EE eta EAJk urteetan indarrean jarri duten bidetik jarraitu, urteen poderioz saretu den eta miseriaren zuloan murgildu gaituzten neurriekin jarraitu? Edo planto? Eta bide hori aldatzeko proposamen eraginkor, erreal eta bideragarriak planteatu, benetan pertsonak ardatz izango dituztenak, sistema publikoaren zutabe eta oinarri direnak, gure kasuan: fiskalitatea, eta zerbitzu publikoak biziberrituz eta sendotuz”.

Zentzu horretan, bizi dugun krisi egoerari erantzuteko eskatu dio Uberak foru gobernuari: enplegua babestuz eta sortuz, zerbitzu publikoak eskainiko dituena, babes soziala mantenduz eta areagotuz, hondakinen arazoa konponduko duena, eta abar eta abar.

“Dena dela, esan beharra daukagu baikor baloratzen dugula foru gobernu honek gizarte politikak ez murrizteko hartu duen erabakia”, nabarmendu du Uberak. Hala ere, gogora ekarri du Foru Aldundiaren aurrekontuak nahiko murrizketa jasan dutela eta murrizketa gehiagok zerbitzu publikoak “kinka larrian” jar ditzazkeela ohartarazi du. Horri aurre hartzeko, defizit publikoa handitu beharra dagoela uste du Aralarrek.

Zentzu horretan, orain arte denon ahotan izan diren proiektu ‘estrategiko’ handi horien ordez, proiektu “xume, zentzuzko eta bideragarrien” alde egitea eskatu du Aralarrek, herritarren beharrei erantzungo dietenak. “Ez dira proiektu ikusgarriak izango, baina bai eraginkorrak; ez dituzte zenbaki potolo eta plano liluragarriak izango, baina bai normalak eta errealitateari egokitutakoak. Edo gure burua engainatzen jarraitu nahi dugu, eta ondorioz herritarrak inolako aterabiderik gabe utzi”.

Uberak gaurko osoko bilkuran azaldu bezala, legegintzaldi honetarako ardatzak ondorengoa izan behar dira, Aralarren aburuz:

- Justizia sozialean oinarritutako fiskalitatea. Bakoitzak irabazten eta duen ondarearen arabera gizarteari ekarpena egiteko zerga sistema: PFEZan, abenduan hasitako norabidean gehiago sakondu behar da, era ausartago batean; elkarteen gaineko zerga berregituratu behar da, benetan enplegua babestu eta mantenduko duen zerga izan dadin; ondarearen gaineko zerga berregituratu behar da. Argi gera dadila, ez garela ari planteatzen zerga gehiago eta zergak igotzea. Baizik eta zergen edukia, izaera, aldatzea.

Iruzurrari tolerantzia zero. Benetako iruzurraren aurkako borroka ahalbidetuko duen plangintza serioa. Marketin gutxiagorekin eta sukaldeko lan gehiagorekin.

- Madrildik datozen murrizketen aurrean, Pase Forala.

- Errekurtsoen optimizazioa eta eraginkortasuna. Dauden Sozietate Foral Publikoen berregituraketa plangintza eta administrazioaren beraren sinplifikazioa. Bikoiztasunekin bukatu, diru publikoaren kudeaketa hobetu eta eraginkortasunean irabazteko.

- Udalen Euskal Legea bideratzen ez den bitartean, Foru Aldundiak udalen harreman ekonomiko zein laguntza teknikoetarako plan bereziak eta salbuespenekoak martxan jarri beharko lituzke, udalekin elkarlanean, behin behineko neurri gisa.

- Inbertsioetarako Foru Funtsaren diseinua. Nahiz eta, diru bilketa jaisten ari den eta ez den batere erraza, gisa horretako funtsa martxan jartzea. Iruditzen zaigu garrantzitsua dela, epe ertain eta luzera begira, lurraldeko ekonomiaren sustapen eta mantenurako.

- Lehenengo sektorea, nekazaritza, abeltzaintza eta basogintza indartzeko eta lurraldeko ekonomian pisua har dezan, biodibertsitatea, dibertsifikazioa oinarri izan da, berregituraketarako, eta garai berrietara egokitzeko neurriak definitu eta ezartzea. Ingurumenarekin eta garapen ekologikoarekin bat eginez.

- Kontratazio politikan irizpideak berritu. Kontratazio zuzena lehenetsi, eta orain arte azpi-kontratazioaren bidez kudeatzen diren zerbitzuak aztertu eta progresiboki, lan baldintzak hobetzeko, prekarietatea ekidinez, irizpide sozialetan oinarritutako plangintza ezarri. Esleipenetan klausula sozialak ezarri.

- Zerbitzu sozialetan: estaldura soziala areagotu eta gizarte zerbitzuen programa guztien helburuak egokitu; zerbitzuetan itxoite-zerrendak bukatzeko plangintza garatu eta horrek eskatuko dituen bitarteko ekonomikoak aurrekontuetan txertatu. Zahar egoitzak foru gobernuak bere gain hartzeko formularen bat aurkeztu, plangintza eta guzti; esaterako, institutu bat izan daiteke; Uztailean, esku artean izan behar dugu adingabeen artatze eredua berregituratzeko plangintza.

- Hondakinen kudeaketarako proiektua. Bai edo bai, gure lurraldera egokitutako benetako irtenbidea behar dugu. Urteetan izan ez dugun irtenbidea. Izan ere, orain arteko planteamenduak irtenbidea baino gehiago, arazoa areagotu egiten zigun, belaunaldietarako gure erakundeak ekonomikoki eta araugintzari hipotekatuz.

- Euskara: aurreko legegintzaldian euskararen normalkuntzarako programak galdu duen %26 berreskuratzea.

- Berdintasuna eta Parte hartzea.

- 2007an, Batzar Nagusietan onartutako garraio publikoa hobetzeko plana bere osotasunean garatzea eta betetzea.

- Lurraldeko herritar guztiontzat orekatua eta diskriminaziorik suposatuko ez duen tarifikazio sistema adostea.

Aralarrek pobretutako pertsonen beharren gaineko ponentzia eratzea eskatu du

Iñigo Olabarri — 2012-05-18T11:27:46Z

Rebeka Uberak, Aralarren Batzar Nagusietako bozeramaileak, proposamen horren egokitasuna defendatu du egoera ekonomikoa etengabe okerrera egiten ari delako, “eta gero eta jende gehiago dago pobrezia egoeran edo pobreziaren mugan”.

Askotarikoa da pobrezia egoeran dauden pertsonen tipologia, Uberak azpimarratu duenez. “Batetik etxerik ez duten eta kalean edo erakundeen menpeko aterpeetan bizi diren pertsonak daude. Bestetik diru sarrerak bermatzeko laguntzak behar dituzten pertsonak gero eta gehiago dira. Hori gutxi balitz, beren pentsio eskasen erruz pobreziara bultzatzen ditugun adinero pertsonak daude. Eta ez dugu ahantzi behar gero eta gehiago direla jantoki sozialetara doazen pertsonak”.

Ponentzia eratzeko arrazoien artean, Uberak gaineratu du lehen horrelako estalduren beharrik ez zuten pertsonetara hedatu dela pobreziaren itzala. “Etxe kaleratzeen ondorioz gertatu da hedatze hori eta, horrez gain, gizarteratze prozesuetan sartuta zeuden hainbat pertsonak pobrezia egoeretara itzultzen ari direla sumatu dute”

Azken urteetan pobreziak jo dituen pertsonen tipologiak eta kopuruek gora egin dute Uberaren esanetan: “esan bezala, askotarikoak dira egoerak eta pertsonak eta diagnostiko sakona eskatzen dute, gero neurri egokiak abian jarri ahal izateko, batez ere, egoera zaila bizi dugulako eta ez duelako ematem egoera horrek epe motzera hobera egingo duenik”.

Donostiako Aralarrek nekazaritzarako gordetako lurren suntsitzea salatu du

Asier — 2012-05-17T07:15:00Z

Merkantzien garraio iraunkor eta orekatua lortu nahi bada, era honetako azpiegituren egiazko beharra berraztertu egin behar dela deritzo Aralarrek. Dena dela, Donostiako Aralarrek uste du inondik inora ez dela jasangarria Astigarragako ibarrean Garraioaren Hiria eraikitzea, Donostialdeko nekazaritzarako lurrik onenetakoa hartuko duelako. Gur eskualdeko lehen sektorearen bideragarritasunaren kontrako eraso zuzen baten aurrean egongo ginateke. Beharrezkoa izanez gero, nekazaritzari eragingo ez liokeen lurretan egin beharko litzateke; errauskailuarentzat prest duten lurretan, adibidez.

Diputazioaren aurreko gobernuak 700 kamioientzat aparkalekua egiteko egin zuen proposamena atzera bota genuen bere egunean, eta orain, kamioi gutxiagoa hartuko lituzkeen aparkalekua egiteko beharrik ez dugu ikusten. Izan ere, Donostialdean badaude kamioientzat gordetako 1.000 aparkaleku baino gehiago.

Garraio eredua aldatzea proposatzen dugu, gure errepideetan gora eta behera dabiltzan kamioiak gordeleku mugikorrak bihurtu direlako; gure errepideak gainezka jarri dituzte eta, ikuspuntu ekologiko batetik, egiten dituzten CO₂emisioak ez dira onargarriak inondik inora. Merkantzien garraioa trenez eta itsasontziz egitea sustatuko duena, eta errepide-azpiegiturak egiteko nekazaritza lurrak suntsitzea saihestuko duena.

Hirigintza lanen ondorioz gure eskualdean etengabeko nekazaritzarako gordeta dauden lurrak suntsitzearen aurren bere kezka azaldu nahi du Donostiako Aralarrek, horrek lehen sektorea desagertzea dakarrelako berarekin eta, aldi berean, independentzia ekonomikoaren galera eta paisaia hondatzea.

Indarrean dagoen ekonomia eredua aldatzea defendatzen dugu, eta tokiko ekonomia jasangarria lehenetsiko duena bultzatu, ekoizle txikiei kutsatu gabeko lurrak eskainiko diena, horrek bertako produktuak kontsumitzea ere ekarriko duelako.

Aralarrek galdetu du Gipuzoako Garraioaren Lurralde Agintaritzaren Zuzendari Orokorra kontratazeko prozesuak Euskararen Normalkuntzarako Legea betetzen duen ala ez

Iñigo Olabarri — 2012-05-16T09:43:44Z

Zenbait hedabidetan argitara emandako iragarkian, hautagaiak unibertsitate titulua izan behar zuela eskatzen zen, eta “hobe euskaraz badaki” gaineratu. Rebeka Uberak, Aralarren Batzar Nagusietako bozeramaileak, larritzat jo du “Gipuzoako Garraioaren Lurralde Agintaritzaren %45 Diputazioaren esku egonda euskarari ematen zaion trataera”.

Uberak gainerati duenez, “foru gobernuak euskararen sustapenaren alde egiten badu eta bizitzaren esparru guztietan hizkuntza eskubideak betearaztearen aldeko jarrera badu, ulertezina da kontratazio prozesu batean pertsona batek euskaraz hitz eta lan egiteko duen gaitasuna ez bermatzea”.

Aralarren bozeramaileak hizkuntza eskakizun jakin bat zergatik ez den ezarri eta lanpostu horri lotutako hizkuntza gaitasuna zein iirizpideren arabera ezarri den galdetu du.

Elgeta eta Eibar, bakearen sinbolo bezala, Gernikari lotzeko deia egin dute Gipuzkoako Batzar Nagusiek

Iñigo Olabarri — 2012-05-14T12:51:36Z

Rebeka Uberak, Aralarren Batzar Nagusietako bozeramaileak, gogorarazi du Gerra Zibilean hasi zirela populazio zibilaren kontrako bonbaketak eta Bigarren Mundu Gerran izan zutela puntu gorena. “Horrelako hilketa masiboak eragin zituztenak kasurik gehienetan inpunitate osoz aritu ziren eta aritzen dira gaur egun ere”.

Aralarren Batzar Nagusietako bozeramaileak nabarmendu du “gehiegikeria horiengatik guztiengatik, Elgetako eta Eibarko herritarrek ez dutela ez aitorpenik ezta erreparaziorik jaso 75 urteotan. Elgetako kasuan ez zen bonbaketa hutsa izan, Espainiako armada sartu zenean hilketak, afusilamenduak eta emakumeen bortxaketak eguneroko kontu bilakatu baitziren”.

“Egokia iruditzen zaigu”, gaineratu du Uberak, “oroimen historikoa, baina aitorpena ere falta da. Sarraskien protagonistak hilda daude eta, beraz, ezin zaie erantzukizunik eskatu, baina pentsatzen dugu sarraskigileen ondorengoek badutela, moralki, zerbait esatea. Alemaniak aitortu du Gernikakoa bere borondatez, baina Espainiako armadak ez du, oraindik ezer aitortu, nahiz eta egungoa frankismoko armadaren oinordekoa izan”.

Aralarrek udan peajeak igotzearen aurka egingo du eta egiturazko konponbideak eskatu ditu

Iñigo Olabarri — 2012-05-11T11:08:52Z

Uberak azaldu duenez, proposameari ikusten dizkion arazoen artean “diskrezionalitatearena dago. Kilometroko tarifak dira Gipuzkoako peajeenak, hortaz zaila egiten zaigu ulertzea zeintzuk diren urtaro batean horiek igotzeko izan daitezkeen irizpideak. Hori horrela, logikoagoa irudituko litzaiguke urte osorako igoerak planteatzea”.

Gipuzkoako bide azpiegituren erabiltzaileak gehiago zamatzea dakarren neurria dela gaineratu du Uberak. “Izan ere erabiltzaile guztiek ez dute Via-T delakoa eta, horiek, lehendik bigarren ingurabidea del aeta 36 zentimo gehiago ordaintzen dituzten eta orain beste 50 igoko zaizkie”.

Uberaren esanetan konponbideak egiturazkoa izan behar du eta ez aldi baterakoa. Ildo horretan garrantzitsutzat jo du aterabidea lanean ari den ponentziatik ateratzea.

Ganberako bozeramaileak erakunde finantzieroekin hartutako etorkizuna baldintzatzen duten neurriak ezin dira albo batera utzi, baina burua hotz mantentzearen aldeko apustua egin du, “bidegurutze baten aurrean gaude eta orain arteko bidearekin jarraitzea edo berri bat hastea da hartu beharreko erabakia”.

Donostiako Aralarrek pertsona guztien eskubide guztiak lantzeko premia aldarrikatu du

Asier — 2012-05-10T11:09:00Z

Gogoratu duenez, Gernikako Akordioak eta Aieteko Adierazpenak mugarriak izan ziren zentzu horretan, eta gauza bera gertatuko da Memoria Historikorako Batzordearekin. Hala, herritarrei eta Udalari oro har eskatu die beharrezkoak diren urratsak ematea, espazio zabal bat irekiz helburu hauekin: Donostiako herritarrek gerra zibilean, Francoren diktadurapean eta GAL, BVE, ETA eta indar polizial eta parapolizialek eragindako indarkeriak berraztertzea eta bistaraztea; horren baitan egon beharko litzateke, halaber, emakumeek eta beren hautu edo jatorri sexualarengatik indarkeria pairatu duten kolektiboak.

“Horretarako, bakearen kultura eraiki behar dugu, tolerantziarena eta gatazkak bide baketsuetatik konpontzearena, zeinetan ardatz nagusia den eta izango den herritar guztien eskubide zibil eta politikoen errespetua. Eta bere tresna nagusia da eta izango da memoria historikoa zaintzea eta mantentzea”.

Aralarrek abian jartzea proposatzen duen Giza Eskubideen Batzorde irekiak, era berean, monarkiari eskainitako 24 kaleak, erlijio katolikoari eskainitako 49ak eta militarrei eskainitako bi dozenatik gora kaleak erretiratzea aztertu beharko du. “Zentzu horretan, proposatzen dugu Aranzadirekin batera fusilamenduak eta lurperatzeak gertatu ziren lekuen mapa egitea eta hori plaken eta gogorazpenen bidez bistaraztea, are gehiago kontuan izan da Donostiako lurretan lurperatuta daude 1936an fuslitatuak izan ziren 400 pertsona baino gehiago”.

Mikel Gardokiren —1975an indar polizialek hildakoa— izena erretiratzeko PP agertzen ari den egoskorkeria gaitzetsu du Donostiako Aralarrek, eta gogoratu du alderdi horrek ez duela presarik erakutsi frankismoko eta diktadura militarreko memoria historikoa errekuperatzeko.

“Tabakalerari zehaztasuna falta zaio edukietan eta funtzioetan”

Iñigo Olabarri — 2012-05-09T20:28:09Z

Edozein kasutan, Aralarren ordezkariak onartu du zehaztasun maila handiagoa eskatzne duen proiektu interesgarri baten aurrean gaudela. “Zirriborro orokorretik haratago, proiektuari edukiak eta funtzioak zehaztea falta zaion irudipena daukagu”, azpimarratu du Aralarren ordezkariak.

Foru ganberako Aralarren bozeramailea jakitun da egungo testuinguruak baldintzatuko duela etorkizuneko zehaztapena. “Erakundeen kutxak beste egoera batean zeuden garaiko egitasmo baten aurrean gaude, hortaz aldaketa beharrezkoa da eta, aldaketa horrek eskatzen du errealitate berrira egokitzea”.

Aralarren ustez Diru sarrerak Bermatzeko Laguntza berria positiboa da kohesio soziala bideratzen laguntzen duelako

Iñigo Olabarri — 2012-05-07T09:22:00Z

Rebeka Uberak gogorarazi du abian jarritako laguntza ez dela berria, izan ere, Aralarrek proposatuta bide horretan sakontzen zuen proposamena onartu baitzuten Batzar Nagusiek 2009an. “Espero dugu bertsio berriak ordukoa hobetuko duela, lehentasunezko gai baten aurrean gaudelako, nahiz eta bizi dugun egoera ekonomikoak ez duen errazten horrelako laguntzak lehenestea”.

Era berean, iruzurra ekiditeko eta prestazio berriak modu egokian funtzionatu ahal izateko, Uberak ezinbesteko jo du Diputazioaren eta Udalen zerbitzu sozialen arteko elkarlana, “beraiek ezagutzen dituztelako inork baino hobeto laguntzak jasotzen dituzten pertsonak”.

Aralarrek horrelako laguntzak beti garrantzitsutzat jo dituela gaineratu du Uberak, “jendea ez delako pobre edo aberats jaiotzen, baizik eta sistema bera da desberdintasunak areagotzen dituena”.

1813ko gertaerak gogoratzeko ekitaldietan gizarte zibila azpimarratzea proposatu du Donostiako Aralarrek

Asier — 2012-05-05T16:45:38Z

“2013ko ospakizuna gizarte zibilari egindako omenaldia izan behar da, bizi izan zuen sarraskia eta gero hiria berregiteko gai izan zelako”, dio Aralarrek bere proposamenean. Era horretara, 2013ko ekitaldiek “indarkeria mota guztietako biktimen inguruko hausnarketa hiritar publikoa eta parte-hartzailea” izatea proposatzen du, “memoria historikoa berreskuratuz eta ikuspegi humanista, antimilitarista eta indarkeria-ezakoa izatea”.

2013ko ekitaldietan, garai hartako donostiarrei eta haiek egindakoei garrantzia eman behar zaiela jasotzen du Aralarrek bere proposamenean. “Donostiar haiek izan ziren biktima anonimoak eta Donostiaren alde guztietako berreraikuntzaren egiazko protagonistak”. Halaber, bakearen kulturan zein pertsona guztien giza eskubideetan sakontzeko aukera paregabea dela deritzo Donostiako Aralarrek.

Donostian bizi diren etorkinak ere hurrengo ekitaldietan parte hartzearen garrantzia nabarmendu du Aralarrek, “haiek ere era honetako bidegabekeriak pairatu dituztelako beren herrietan”. Gazteriak ere parte hartzearen beharra ikusten du, historiaren beste ikuspegi bat izan dezan eta gizarte honen eta etorkizuneko gizartearen eraikuntza zibil eta sozialean aktibatu daitezen.

Emakumeen ahotsa berreskuratzeko premia ere ikusten du Donostiako Aralarrek. “Herritar eta emakume ziren heinean, indarkeria bikoitza jasan zuten emakumeek hiria hartu eta erre zutenean, eta hiriaren berreraikitze sozial zein politikoan paper funtsezkoa jokatu zuten”.

Udalean ordezkaritza gabe geratu arren, Beasainen alde lanean jarduteko prestutasuna agertu du Aralarrek

Asier — 2012-05-04T09:15:00Z

“Horregatik, egoera berezi honetan, herritarrok behar ditugun erantzun bizkor bezain arduratsuak aurrera eramateko, gure prestutasuna adierazi nahi diegu herriko eragile sozial zein politikoei, elkar lanerako gure eskua luzatuz. Baina bereziki orain arte udalean gure bidelagun izan den Bildu taldeari luzatzen diogu eskua, Aralar eta Bildu artean hitzartu genuen gobernu programa garatzeko”, esan dute Beasaingo Aralarreko ordezkariek.

Agerraldiko testua osorik:

Urte bete da Aralarrek Beasainen Udalgintzarako programa aurkeztu zuela, eta beasaindarren babesari esker ordezkaritza lortu zuela. Emaitzek, Beasaindarren gehiengo batek aldarrikaturiko aldaketa posible egin zuten, eta ondorioz, programa oinarri, Bildu-Aralar gobernu akordioa egin zen.

Aralarren asmoa eta helburua izan da eta da, Beasaindarren eta Beasaingo herriaren alde lanean jardutea. Ilusio handiz aurkeztu ginen Beasainen, gure proiektua oinarri eta helburu izan da, eta ilusioz lanean jarraitzen dugu.

Aralarrek gaurko prentsaurrekoan adierazi nahi du, Aralarren izenean aurkeztu eta udalean zinegotzi den Unai Baztarrika jaunak, alderditik eta Aralarren proiektutik kanpo kokatu zuela bere burua. Gauzak horrela, alderdiak bere autoeskluzioaren ondorioz, zinegotzi kargua eskatu zion. Baina berorrek zinegotzi kargua bera aurkeztu zen alderdiaren esku ez zuen utzi. Hori dela eta, egoera triste horrek, eraman gaitue udalean ordezkaritza gabe geratzera.

Halaber, adierazi nahi dugu egoera horrek ez gaituela etsi, eta inoiz baino tinkoago eta ilusio handiagoarekin Beasaingo herriaren alde lanean jarduteko gogotsu aurkitzen garela, bere unean aurkeztutako programa garatzeko asmotan. Are gehiago, Euskal Herriak bizi duen egoera zail, bezain itxaropentsu honetan.

Horregatik, egoera berezi honetan, herritarrok behar ditugun erantzun bizkor bezain arduratsuak aurrera eramateko, gure prestutasuna adierazi nahi diegu herriko eragile sozial zein politikoei, elkar lanerako gure eskua luzatuz. Baina bereziki orain arte udalean gure bidelagun izan den Bildu taldeari luzatzen diogu eskua, Aralar eta Bildu artean hitzartu genuen gobernu programa garatzeko, eta Euskal Herrian hasitako indar metaketa eta elkar lanari, Beasainen ere, jarraipena emateko, Beasaingo eta Beasaindarren eguneroko kezka eta premiei erantzuteko asmoz.

Aralarrek Gipuzkoako Bakegintzaren gaineko ponentzian parte hartuko du guztiek berdintasunean egotea ahalbidetzen duelako

Iñigo Olabarri — 2012-04-27T09:24:37Z

Agerraldia osorik

Aralarren irudikoz, irabazle eta galtzailerik gabeko Bakea eraikitzeko, atzera bueltarik izango ez duen bakea eraikitzeko urratsak guztion artean eman behar dira, inongo bazterketarik gabe. Eta urrats horiek emateko, elkarrizketa da bidea, salbuespenik gabeko elkarrizketa integratzailea eta ez baztertzailea.

Aralarrek adierazten du, Gernikako Akordioan dauden printzipioak, eta Aieteko Bake Konferentziako ondorioak direla, Bakegintza eta Normalkuntza politikoan jarraitu beharreko ibilbide orri eta irizpideak.Alderdi, eragile sozial eta sindikal guztiei irekiak egon diren eta irekita dauden oinarriak.Eta bide horretan ardatz eta gakoa, elkarrizketa dela adierazi nahi dugu.

Aralarren garbi daukagu, bakea eraikitzeko, erakundeetatik haratago jardun behar dugula. Ekimena erakundeetatik gaindikoa izan behar dela. Baina hori esan da ere, argi adierazi nahi dugu erakundeetan ere ekimenak bideratu behar direla. Ekimen integratzaile, eta ez baztertzaileak, ordezkari guztien parte hartzearekin. Bakearen eraikuntzan laguntzeko, eta bidea egiten jarraitzeko.

Bere momentuan ere esan genuen eta gaurkoan ere berresten gara, Gipuzkoan Bake ponentzia bat martxan jartzeak, ez duela zentzu handirik. Oso partziala baita eta mugatua. Gure ustez, bestelako aterki zabalagoa eskatzen du, eta baita ere erakundeetatik kanpo, alderdien arteko, harremanak gaur egun daudenak baino normalizatuagoak egotea, gainerako gatazketan gertatu den bezala, amaiera elkarrizketatua ahalbidetzeko. Oraindik ere gurean, urruti xamar ikusten duguna, zoritxarrez. Halaber, sortu nahi den ponentzia honi instrumentalizazio arrisku nabarmena ikusten diogu, legebiltzarreko hauteskundeak atarian ditugula jakinik. Nolabait, B.N hauek zirko mediatikoa bilakatzeko arriskua ikusten dugu, bestelako helburu bat izan beharrean, eta momentuak eskatzen duen seriotasuna eta ardura albo batera utziz.

Hausnarketa hau eginik ere, garbi daukagu arriskatzeko eta ausardiaz jokatzeko garaietan gaudela. Izan ere bakearen eraikuntzak arriskatzea eta ausardia eskatzen baitu. Horregatik, Aralarren hasierako jarrera bake ponentzia honen aurrean parte hartzearen aldekoa izango da, alegia, baiezkoa emango diogu. Baiezkoa emango diogu, , beti ere gutxienezko akordioa badago, B.Netan sortuko den ponentzia honetan, salbuespenik gabe, indar politiko guztiek, aukera dutelako berdintasunean parte hartzeko, hala nahi dutenak behintzat. Urrats bat izan daitekeelako, erakundeetatik kanpoko alderdien arteko salbuespenik gabeko elkarrizketa abian jartzeko, oinarriak lantzeko. Eta gure lurraldean, errespetuan oinarritutako elkarbizitza normalizatua bultzatzeko lagungarri izan daitekeelako.