Hemen zaude: Hasiera › Herriz herri › Bizkaia › Albisteak › Bilboko Metroaren lan-gatazkan Lehendakariak egindako esku-hartzea salatu du Aralarrek

Bilboko Metroaren lan-gatazkan Lehendakariak egindako esku-hartzea salatu du Aralarrek

2011/12/15
Dani Maeztu Aralarreko koordinatzaileordeak eta legebiltzarkideak Patxi Lopez lehendakariak Bilboko Metroaren lan-gatazkan egindako esku-hartzea salatu du. “Populismoan erortzen ari da Lopez eta konpontzeko eta negoziatzeko bere bideak dauzkan lan-gatazka baten erdian sartu da; enpresari eta langileen ordezkariei dagokie gatazka horri konponbidea bilatzea”.

Aralarreko ordezkariak gogoratu dionez, “bere buru Ajuria Eneatik kanpo ikusten badu ere, oraindik ere EAEko Lehendakaria da, eta horren araberako jarrera izan behar du, populismoan erori gabe. Egun jakin bateko lan-gatazka baten erdian sartu beharrean, La Naval edo Gruas Aldaiturriaga eta beste hainbat enpresetako gatazketan bai egin behar zuen esku-hartzea, ERE eskaera horiek baztertuz, horren ondorioz familia asko geratu direlako langabezian”.

Era berean, langileak aurrez-aurre jartzeko egindako ahalegin “arduragabea eta lotsagabea” salatu du Aralarrek. Izan ere, Lehendakariak soldatak eta balizko lan-segurtasuna jarri ditu mahai gainean, erabili dituen datuak egiazkoak ez direla jakin arren, lan batzordea eskatzen ari dena zuzendaritzarekin adostuak dituen zenbait kontzeptu betetzea, orain betetzen ez direnak. Bere burua ezkerrekotzat duen gobernu bateko gidari batengatik espero genuen azkena langileak aurrez-aurre jartzea zen”.

Aralarren ustez, Lehendakariaren jarrera “moralik gabekoa eta hipokrita” izan da, “grebarako eskubidea praktikan jartzeak herritarrei eragin ahal dizkien kalteak erabili dituelako, eta ahaztu egiten delako bere gobernuak egiten dituen murrizketek kalte handiak egiten dituztela herritarren artean, eta ez egun bakar batean, baizik eta egunero”.

Dani Maezturen ustez, Lehendakariaren jarrera "arduragabea eta populista" da.