Hemen zaude: Hasiera › Herriz herri › Araba › Albisteak › Marotoren gobernuaren iruzurra salatu du Aralarrek

Marotoren gobernuaren iruzurra salatu du Aralarrek

2012/02/20
Aralarrek gero eta kezka handiagoz ikusten du Marotoren gobernuak gasteiztarroi egiten dion etengabeko iruzurra eta haren udal politika norabide gabekoa. .

Iruzurra egiten du, Gasteizek gaur egun milioi euro asko galtzen dituelako, udal gobernuak Gasteizen bizi dugun testuingurua onartzeari muzin egiten diolako, Landatxoko polikiroldegia edota makroproiektuen indemnizazioen kasuetan bezala.

Iruzurra, gardentasunik gabe lan egiten duelako, hainbat kontratazio eta udal gobernuaren koordinatzaileen soldaten kasuetan bezala.

Iruzurra, publikoa dena pribatizatuz doalako eta udal enplegu publikoaren kanporaketagatik, udal gastua negozio pribatu bihurtzen eta seguru aski lan poltsak eta aldi bateko lanpostuak desagertarazten, heziketa-zentruetan edo Mendizorrotza eta Gamarrako udako kanpainetan.

Iruzurra, zerbitzu sozialak behar dituzten pertsonak behin eta berriro susmopean jartzeagatik, jateko diru-laguntzak behar dituzten 18 eta 23 urte bitarteko gazteen kasuan bezala.

Aralarretik Marotoren udal gobernuari erantzukizuna eskatzen diogu Gasteiz egun bizi den egoerari aurre egiteko eta hiriarentzako etorkizun hobea eraikitzeko. Zalantzarik gabe, hori guztia soilik lortuko da berdintasuna eta gardentasuna ardatz izango duen kudeaketa eginez eta herritarron benetako parte-hartzeaz.