Hemen zaude: Hasiera › Aktualitatea › Albisteak › Zabaletak UPN salatu du, NaBaik pairatu duen infiltrazioari probetxua ateratzeko ahalegina egiteagatik

Zabaletak UPN salatu du, NaBaik pairatu duen infiltrazioari probetxua ateratzeko ahalegina egiteagatik

2009/08/20
  • Patxi Zabaleta
  • Nafarroa
  • Nafarroako parlamentua
Aralarreko koordinatzaile Patxi Zabaletak UPN alderdia salatu du Radio Euskadin egindako elkarrizketa batean. "Irmoki salatzen dugu NaBairen egonkortasuna apurtzeko infiltrazioa politikoki erabiltzeko egin duten ahaleginagatik". Ildo horretatik, Alderdiak "behar den guztia salatzen jarraituko duela" eta "dauden irtenbide juridikoak" aztertzen ari direla adierazi du.

Beste alderdien jarrerari dagokionean, "zintzotasuna" behar dugula esan du Zabaletak, "baita erakunde politikoetan lan egiten dugunekiko". Horren harira, Aralarreko koordinatzaileak argi dauka "UPN izan dela egoera honekin probetxua ateratzen saiatu den alderdia". Hala ere, lasaitasuna eskatu dio gizarteari, alderdian horrelakoak ez gertatzeko lanean jarraituko dutela, eta gertaera honek "planteamendu eta ardura politikoekin gogor lanean jarraitzeko" balio izango duela.

Elkarrizketa horretan Nafarroako Parlamentuak onartutako testua ere aipatu da, non Mallorkako atentatuaren ondoko biktimekiko elkartasuna adierazten zen. "Eusko Legebiltzarrak onartu zuen testu bera proposatu genuen guk, beraz, ez gara gu izan, hain zuzen ere, kontraesanetan aritu garen alderdia", adierazi du. Izan eren, Eusko Legebiltzarrean aho betez onartu zen testua, PP, PSE, Aralar, EA, EB eta PNVren aldeko botuekin. UPN eta PSN alderdiek dute hor erantzunkizuna, "Nafarroan aldarrikapen hori haratago eraman nahi izan zutelako". Atentatuen erabilera politikoa egitea egotzi die Zabaletak, beraiek proposatzen zuten aldarrikapenean edukin poltikoa gehitu nahi izan zutelako. Horren harira, honako galdera hau helerazi die: "zer irudituko litzaiekeen guk egindako proposamenean autodeterminazioaren aldeko erabakia onartzea eskatuko bagenu?".