Hemen zaude: Hasiera › Aktualitatea › Albisteak › Zabaletak ohartarazi duenez, Barcinaren adierazpenek agerian uzten dute UPN eta PSNren artean jada ez dituztela 25 eserleku

Zabaletak ohartarazi duenez, Barcinaren adierazpenek agerian uzten dute UPN eta PSNren artean jada ez dituztela 25 eserleku

2010/02/10
  • Patxi Zabaleta
  • Nafarroa Bai
Atzo UPNk eta PSNk egin zuten bileraren ondoren Barcinak esan zuen bi alderdiok beste alderdi batzuetara ere zabaltzen zutela akordioa. Gaur eguerdian, Patxi Zabaleta Nafarroa Baiko bozeramaileak ohartarazi duenez, “Barcinaren adierazpenetatik ondorioztatu daiteke UPN+PSN formula jada ez dela Gobernua eskuratzeko besteko formula. Barcinaren hitzek agerian uzten dute ez dituztela 25 eserleku eskuratzen, eta hurrengo urteko hauteskundeetan gobernua galtzeko beldur handia dutela ere uzten du agerian”.

“PSNk bermatzen du eskuineko gobernua izatea Nafarroan, 2007ko hauteskundeetan ezkerrekoa eta aurrerakoia izan behar zen aldaketaren alde botoa eman zuten guztien lotsarako, batez ere enpresa handien interesei begira ari den eskuinarekin nazkatuta dauden herritarren lotsarako”, esan du Zabaletak.

Nafarroa Baiko bozeramaileak ohartarazi duenez, “ekonomia zein arlo sozialetan alarma gorri guztiak pizten ari dira. Langabeziaren hazkundea ez da amaitu oraindik, eta arazo hori larritzen doan heinean, erreforma sakonak behar izango dira. Gaur egun arteko sistemak, enplegu planak, esaterako, agortuta daude, eta horien eraginkortasun eta egokitze eza agerian geratu dira”.

Zabaletak azpimarratu duenez “agerian geratu da, beste behin, PSNk UPNrekin bakarrik egiten ditu hitzarmenak, eta orain beste alderdi batzuk tartean sartzeko aitzakiak ez du balio, nahiz eta antagonisten arteko elkarrizketak beti izan beharrezkoak”.

“Gero eta beharrezkoagoa da politika egiteko formulak aldatzea Nafarroan; gero eta beharrezkoa da ekonomia arloan zorrotz jokatzea, Administrazioaren austeritatea, dirurik ez xahutzea eta ustelkeriaren kontrako borroka”, adierazi du Nafarroa Baiko bozeramaileak.