Zabaleta: “Etorkizuneko ezker abertzale handiak hartuko duen esparru politiko, zibil eta arau demokratikoetan bakarrik oinarritukoa eraikitzen ari gara”

Zentzu horretan, “lanean, eta bidea” egiten ari direla azpimarratu du. “Epe laburrera, inkognitak askoz handiagoak dira, gure ustean antidemokratikoa den lege batean oinarrituta ilegalizazioak gertatzen ari direlako”. Horren harira, Estrasburgoko epaitegiaren sententzia ere antidemokratikotzat jo du Zabaletak.

Gaineratu duenez, “beste inkognita batzuk ere badaude, Earen egoera, esaterako. Bere garaian, garrantzia handia izan du alderdi horrek, baina orain zailtasun handiak ditu. Hori errealitate bat da”.

“Osagai horiekin”, zehaztu du, “beste era bateko erabakiak ere izan daitezke, eta legez kanpo utzitako ezker abertzaleak, hau da, Batasunak, izan dezakeen eboluzioak eragina izan dezake horretan”.

Horren guztiaren ondorioz, “gu tinkoak izango gara gure posizio ideologikoak defendatzerako orduan. Aralarren jarrera oso argia da: ezker abertzale demokratikoa, ‘zibil eta zabala’, eraikitzen joan behar gara, eta bitartean, gertatzen ari denaren aurrean adi egon behar dugu”.

Zabaletak azaldu duenez, “indar abertzale guztiak ezin dira batera joan hauteskundeetarako eskaintza eginez Euskal Autonomia Erkidegoan, horrela egiteko arrazoi taktikorik ez dagoelako. Nafarroan, ordea, bai. Baina Nafarroan, hauteskunde marka horren edukia abertzalea eta ezkerrekoa izan behar da”.

PSE-EE eta PPren arteko hitzarmenaz, Aralarreko koordinatzaileak gogoratu du ez zutela bat egin hauteskundeetarako. “Hauteskundeen ondoren batu ziren, baina epe luzera, hauteskundeen ondorengo hitzarmen horiek PSEri PPri baino kalte handiagoa egingo diote”.

ETAk atentaturen bat eginez gero, “eskuinari egingo lioke mesede, PPri, Espainiako gobernuari eta bere politikari”. Gaineratu duenez, “Espainiako zentralismoak amortizatua dauka ETAren indarkeria eta ETAren edozein atentatu alderdi politiko abertzaleen interesen kontrakoa da, zilegitasunik gabekoa izateaz gainera. Gainera, oro har ezker abertzaleari egingo lioke kalte, eta bereziki, legez kanpo dagoen ezker abertzaleari”.