Hemen zaude: Hasiera › Aktualitatea › Albisteak › PPk Garoñari emandako luzapena gaitzetsi du Aralarrek

PPk Garoñari emandako luzapena gaitzetsi du Aralarrek

2012/02/19
  • Energia
  • Energía nuclear
Aralarrek berriro gaitzetsi du energia nuklearraren erabilera eta Mariano Rajoy buru duen gobernuak Garoñari luzapena emateko erabakia salatu du. Alderdiak gogoratu du Legebiltzarrean gai honen inguruan ekimena erregistratu zuela, "Garoñaren itxiera eskatzeko eta talde guztien iritzia argitze aldera".

Aralarren legebiltzarkide Dani Maeztuk ohartarazi du Alderdi Popularrak” atzera” egiten duela “zentzu guztietan”. “Gizarteak hainbat aldiz adierazi duenaren aurka jotzen du; Eusko Legebiltzarrak hainbatetan Garoñaren itxiera eskatzeko egindako ebazpenei muzin egiten dio; eta oztopoak jartzen dizkio energia garbi eta berriztagarrien garapenari”, azaldu du Maeztuk.
Aralarrek legebiltzarkidearen iritziz, “onartezina” da Alderdi Popularraren jarrera, “krisi ekonomikoa aitzakia hartzen duelako neurri latzak eta ondorio larridun neurriak hartzeko”. Maeztu lan erreforma eta energia nuklearraren aldeko apustua jarri ditu adibide moduan. “Gizartea beldurtzeko estrategia erabiltzen dute, euren politika justifikatzeko testuinguru ekonomikoa aitzakia hartuz”, salatu du.
Bestalde, energia gaietan Aralarren bozeramaileak gogoratu du energia ereduaren inguruko eztabaida ukatu egiten zaiola gizarteari. “Beharrezkoa da gai honen inguruko hausnarketa parte hartzailea egitea, beharrezkoa den garapen ereduaren aldaketa bizitzen ari garelako”, gaineratu du.
Ildo horretatik, Aralarrek Eusko Legebiltzarrean legez besteko proposamena erregistratu zuen, berriro ere Garoñaren itxiera eskatzeko eta talde parlamentario guztien iritzia argitze aldera.