Hemen zaude: Hasiera › Aktualitatea › Albisteak › Basabe: “Orain arte zer gertatu den eta eredu bakoitzak zer eman duen kontuan hartu behar du Hezkuntza sailak marko berria planteatzeko orduan; ezin da zerotik hasi”

Basabe: “Orain arte zer gertatu den eta eredu bakoitzak zer eman duen kontuan hartu behar du Hezkuntza sailak marko berria planteatzeko orduan; ezin da zerotik hasi”

2010/03/03
  • hezkuntza
  • basabe
  • ereduak
  • celaa
“Badakigu zein den bi hizkuntza ofizialak nahikotasunez jakiteko helburuari ondoen erantzuten dion eredua; beraz, ezin gaitezke zerotik hasi. Eredu horixe oinarri hartuta egin behar dira esperimentuak”. Hala adierazi du Aralarren legebiltzarkide Mikel Basabek, Isabel Celaa hezkuntza sailburuaren marko hirukoitzaren proiektuaren berri izan ostean.

Basabek azaldu duenez, “hezkuntza ereduen helburuetako bat guztiok partekatzen dugula jakinda, hau da, hizkuntza ofizial biak nahikotasunez jakitea derrigorrezko bigarren hezkuntzaren amaieran, eta helburu horretarako ondoen balio duen eredua bat dela jakinda, ingeles-maila egokia lortzeko egin gura diren aldaketak eredu hori oinarri harturik egin behar dira.”. Aralarren legebiltzarkidearen iritziz, “helburua ondo zehaztu behar da, horretarako oinarria zein den jakin egin behar da eta helburu hori betetzeko neurketak zelan egingo diren jakin egin behar da”.

Horren haritik, Basabek defendatu du “daukagun eskarmentutik abiatu behar izatea. 30 urteotan izan dugun hezkuntza sistemak emandako eskarmentua aintzat hartzea ezinbestekoa da; ezin da zerotik hastea proposatu. Orain arte zer gertatu den eta eredu bakoitzak zer eman duen kontuan hartu behar du Hezkuntza sailak marko berria planteatzeko orduan”. Basaberen ustez, “gaur ekarri den planteamenduak zehaztapen gehiago behar ditu; jakin egin behar da, besteak beste, zelan egingo diren neurketa etengabeak, esperimentazio-prozesuak dauzkagun emaitzak betetzen ez direla erakusten duen une beretik hartu beharreko neurriak hartu ahal izateko”.