Maeztu: “Eusko Jaurlaritzak, aurreko gobernuaren antzera, interes ekonomiko partikularrak lehenesten ditu, Praileaitz babestu beharrean"

Aralarren legebiltzarkide Dani Maezturen iritziz, “zaila zen aurreko gobernuak egin zuena baino okerrago jardutea, baina Eusko Jaurlaritzak maila hori berdindu du”. Magdaleniensis garaiko aztarnak dituen Praileaitz kobazuloa babesteko asmoz  Legebiltzarrean izan den eztabaidaren harira egin ditu adierazpenok. Maeztuk “diskurtsoa aldatzen aritzea” leporatu dio alderdi sozialistari: “PSE txaketa aldatzen ari da Lopezekbizilekua aldatu zuenetik;  herritarrei mezu garbia helarazten ari da, berdin dela nork gobernatzen duen, batzuen interes ekonomiko partikularrak interes orokorraren eta ondare kulturalaren babesaren gainetik  egongo direlako beti".

Aralarrek Praileaitz babestea  ezinbestekotzat jo du eta inguru horretan harrobirik ez baimentzeko apustu garbia egin du. “Harrobiaren lobbyaren aurka egiteko garaia iritsi da”, esan du Maeztuk  eta EAJk eta PSEk  lortutako akordioa kritikatu legebiltzarkideak : "Ez dio inondik inora babes nahikoa eskaintzen” eta “garaia da konpromiso zehatzak hartzeko eta erretorika albo batera uzteko”.

Aralarrek EAren jatorrizko proposamenari  egindako zuzenketan, bi puntu nabarmentzen dira: “alde batetik, lurrazpiko eremu osoaren errealitate metriko eta morfologikoa zehazteko ikerketak egin behar dira, azalera guztian dagoena ezagutze aldera eta babestu behar dena zer den zehazte aldera; bestetik, ezinbestekoa deritzogu Kultur Ondarearen Lurralde Arloko Plana burutzea, arkeologikoki balio handia duten zonaldeak babesteko ”.  

Maeztuk adierazi du “beharrezkoa dela Praileaitz I eta multzo arkeologiko osoa lehenbailehen babestea”. Helburu hori lortzeko gaitzetsi egin du Kultura sailak argitaratu zuen dekretua, kobazuloaren babes eremua inguruko 65 metrotara mugatzen zuelako .