Hemen zaude: Hasiera › Aktualitatea › Albisteak › Kartelak eta argazkiak kentzeko orduan “ardura eta zuhurtzia eza” leporatu dio Aralarrek Aresi

Kartelak eta argazkiak kentzeko orduan “ardura eta zuhurtzia eza” leporatu dio Aralarrek Aresi

2010/10/27
  • argazkiak
  • basabe
  • ares
  • presoak
Getariako Harralde tabernatik Ertzaintzak kartelak zergatik kendu zituen, ze lege oinarri erabili zuen, azaltzeko eskatu zion Aralarrek Ares sailburuari. Aldiz, gaur Legebiltzarreko batzordean “ez duela hori argitu” leporatu dio Mikel Basabe Aralarren legebiltzarkideak. Are gehiago, Basabek salatu egin du sailburuak “gainerakooi eskatzen digula ardura eta zuhurtzia, baina kartelak erretiratzeko jardunbidean, sarritan, ez dela egoten ez ardurarik, ezta zuhurtziarik ere, Ertzaintzaren aldetik”.

Aralarren legebiltzarkideak Herrizaingo sailburuari gogorarazi dio, Getariako Harralde tabernatik kendu zirenak ez zirela presoen argazkiak izan. “Kendu zena pankartak eta kartelak izan ziren, eta batzuk eztabaidagai izan liteke delitu direnentz, baina ez dago zalantzan jartzerik kendu zirenen artean delitu ez direnak ere bazeudela”, adierazi du Basabek. Ildo horretan, Aralarren legebiltzarkidearen iritziz, Ares jaunak ez du argitu zein lege oinarri erabiltzen duen Ertzaintzari kartelak kentzeko agindua emateko orduan. “Jarraitzen dugu jakin barik Herrizaingo sailburuak non jarri duen muga”, gehitu du Basabek.

Bestalde, Aralarrek interpelazioa egingo dio Rodolfo Ares sailburuari azal dezan “Israelgo Maccabi saskibaloi taldearen partidaren aurretik Ertzaintzak pankartak kentzeko arrazoiak zein izan ziren”. Buesa Arenaren kanpoaldean Palestinaren alde ipinita zeuden hainbat pankarta kendu zituen Ertzaintzak, urriaren 21ean. Basaberen iritziz, “pankarta horiek aldarrikapen politiko hutsak jasotzen zituzten, ez zegoen bartan irainik, mehatxurik edo bestelakorik. Aitzitik, giza eskubideen defentsa besterik ez zen egiten, palestinarren kontrako genozidioa geratzen eskatuaz”. Hori dela eta, interpelazioa egingo dio Aralarrek Herrizaingo sailburuari.