Hemen zaude: Hasiera › Aktualitatea › Albisteak › Jon Abril: “Estatutuen irakurketa positiboa egiten dugu inflexio puntua delako”

Jon Abril: “Estatutuen irakurketa positiboa egiten dugu inflexio puntua delako”

2011/02/07
  • aralar
  • Alderdien Legea
  • Abril
Aralarreko koordinatzaile ordeak Jon Abrilek, ezker abertzaleko beste sentsibilitateak alderdi berriaren estatutuen aurkezpenean irakurketa positiboa egin du Aralarrek “oso garbi hitz egiten duelako , inflexio puntu bat delako, iraganeko eskemekin eta mezuekin hausten duena, eta argi adierazten duelako indarkeri ororen kontrako jarrera, eta bereziki ETAren indarkeriaren bazterketa”. Abrilek argi azaldu du “Aralar beti egon dela ilegalizazioaren kontra, alderdien legearen kontra gaudelako eta orain inoiz baino arrazoi gehiago daude legeztapenerako”.

Abrilekin batera Rebeka Ubera, Aralarreko antolaketa arduraduna, Iñaki Aldekoa, Aralarreko Batzarkidea Araban eta Iosu Murgia, Aralarreko Bizkaiko koordinatzailea izan dira gaur goizean Lokarrik antolatutako estatutuak aurkezteko ekitaldian.

Aralarren koordinatzaileordearen hitzetan legeztatuak izateko duten borondatea “argi dago eta horretarako urratsak eman dituzte, bide soilik politikoen aldeko apustu irmoa eginez eta egoera berri bat sortzeko ahalegina eginez”.

Jon Abril estatuari zuzendu zaio eta Ezker Abertzalearen beste sentsibilitateak emandako urrats honek “estatuaren aldetik erantzun argia behar du, legalizazioaren bidetik konbikzio demokratikoengatik eta baita Euskal Herriko gizartearen gehiengo oso zabalak hala eskatzen duelako”.

Aralarren koordinatzaile ordearen ustetan “Jarrera honek hurbildu egiten gaitu Aralarrek beti defenditu duen  etorkizuneko ezker abertzale bateratu baterantz, bere sentsibilitate guztiak aitortu eta bilduko dituena”.