Genero indarkeria jasan duten emakumeentzako harrera etxean euren kabuz uzten duten emakumeen egoeraren berri izateko protokolorik dagoen jakin nahi du Aralarrek
- matxista
- indarkeria
Aralarrek Mariola Serrano Genero-indarkeriaren Biktimei Laguntzeko Zuzendaritzaren agerraldia eskatu du Legebiltzarrean, “azal dezan ea badagoen euren borondatez harrera etxeetatik joatea erabakitzen duten emakumeen egoerari jarraipena egiteko eta laguntza emateko protokolorik, eta egon ezean zer nolako urratsak eman nahi dituzten egun duten babesa hobetzeko”. Ekimenaren asmoa hain justu da ezagutzea protokolorik badagoen, are gehiago Genero-indarkeriaren Biktimei Laguntzeko Zuzendaritzaren ardura denean “prebenitzeko programa integralak eta genero-indarkeriaren biktimei laguntzeko programak organismo eta administrazio publikoen artean sustatzea eta koordinatzea eta EAEn baitan garatutako programa eta proiektua gainbegiratzea,m baita horien jarraipena egitea ere”.
Zarautzen izandako neskatoaren heriotzak agerian utzi du beharrezkoa dela indarkeria matxista jasan duten emakumeei eta euren seme alabei arreta egiten dieten erakundeek egiten dituzten politiken gainean hausnarketa egin beharra; agerian geratu diren defizitei ahalik eta azkarren erantzuna bilatu behar zaie. Ildo horretan, Aralarrek, Genero-indarkeriaren Biktimei Laguntzeko Zuzendaritzaren agerraldia eskatzeaz gainera, ekimena aurkeztu du “Eusko Legebiltzarrak Eusko Jaurlaritzari eska diezaion, berehalakoan, Etxeko tratu txar eta sexu erasoen biktima diren emakumeei eskaintzen zaien laguntza hobetzeko Erakundeen arteko Akordioaren Jarraipen Batzordearen bilera, indarrean dauden politiken hutsune esanguratsuak ahalik eta azkarren zuzentzeko”. Ekimena urgentziazko prozeduraz eztabaidatzea eskatu du Aralarrek.