Hemen zaude: Hasiera › Aktualitatea › Albisteak › Fiskaltzak atxilotuek egindako eraso sexualen eta tratu txarren salaketak iker ditzala eskatu du Aralarrek Eusko Legebiltzarrean

Fiskaltzak atxilotuek egindako eraso sexualen eta tratu txarren salaketak iker ditzala eskatu du Aralarrek Eusko Legebiltzarrean

2011/03/09
  • ezenarro
  • atxiloketak
  • salaketak
  • ikerketa
Ustez ETAko kide izateagatik atxiloketa inkomunikatuan dauden lau pertsonek tratu txarrak eta eraso sexualak salatu dituztela eta, Aralarrek ekimena aurkeztu du Legebiltzarrean, ganberak Fiskaltzari eska diezaion “iker ditzala Beatriz Etxebarriak egin duen eraso sexualen salaketa eta gainontzeko atxilotuek egin dituzten tratu txar eta mehatxuen salaketak”. Aralarren bozeramaile Aintzane Ezenarrok ekimenean adierazi duenez, “salaketa horiek ezinbestean eta behar duten berme guztiekin ikertuak izan behar dira”.

Hala, Ezenarrok gogora ekarri du, 2010eko abenduaren 1ean gobernuak Eusko Legebiltzarrean aurkeztu zuen “Motibazio politikoko indarkeriak eragindako giza eskubideen urraketa eta beste sufrimendu bidegabeak jasan dituzten biktimei buruzko” txostenean, “argi adierazten da espainiar estatuan ez direla behar bezala ikertuak izan tortura salaketak; jokabide hori zuzendu beharreko jokabide gisa aurkezten zen eta hala onartu genuen, gainera, Eusko Legebiltzarrean ordezkatutako alderdi politiko guztiek”.

Era berean, ekimenean jasotzen denez, “martxoaren 8an Giza Eskubideen Europako Auzitegiak Espainia zigortu zuen Aritz Beristain Ukarrik salatutako torturak behar bezala ez ikertzeagatik”. “Horregatik guztiagatik, Beatriz Etxebarriak salatutako sexu erasoa eta gainontzeko atxilotuek salatutako mehatxu eta tratu txarrak ikertzea ezinbestekoa da, are gehiago, iraganean izandako hutsegiteak gainditu nahi baldin badira eta demokrazian eta giza eskubideen bermean sakondu”, dio Ezenarrok.