Ezenarro: Aresek Aralar kritikatzen du Gernikako jauzi kualitatiboa ikusi nahi ez duelako

Aralarren legebiltzarreko bozeramaile Aintzane Ezenarrok ETBn egindako elkarrizketan adierazi du Gernikako akordioak ETAri aldebakarreko su-etena eskatzen diola indarkeria uzteko borondatearen adierazpen gisa, “ETAk eta Herrizaingo sailburuak horrelakorik ikusi nahi ez badute ere”. “Deigarria egiten zaigu bai ETAk zein Ares jaunak bat egin izana, eta kontuan hartu nahi ez izana Gernikako akordioan jasotzen diren aldebakarreko eta behin betiko su-eten hitzak”, azpimarratu du Ezenarrok. Hori dela eta, esan du Ares sailburua Aralarren kontra aritzeak agerian uzten duela Gernikako Akordioak suposatu duenaren aurrean beste aldera begiratzen duela. “Era horretan, jarrera immobilistari eusten dio, baita ETAk ere”. “PSE eroso dago egoera horretan, baina horri eusteko derrigorrezkoa du jarrera immobilistari eutsi eta inolako erabakirik hartzeari uko egitea, Gernikan izandako jauzi kualitatiboari muzin eginez”.

Ildo horretan, Ezenarrok azpimarratu duenez, “Gernikako akordioak ekarri duena da Batasuna ere gehitzea besteok ETAri egin izan diogun alde bakarreko su-eten eskarira, indarkeria behin betiko uzteko borondatearen adierazle gisa. Hori jauzi kualitatiboa da inondik inora, paradoxikoki ez ETAk ezta Herrizaingo sailburuak ikusi nahi ez dutena”.

Bozeramaile abertzalearen iritziz, “Batasunak aldebakartasuna onartu izana mentalitate aldaketa handia izan da”. “Gutariko bakoitzak eman behar ditugu pausoak, banaka zein kolektibo gisa bakera bidean egin behar dugunaren erakusle. Aldebakartasun hori da, hain justu, Batasunaren diskurtsoaren berritasuna, Gernikako akordioan jasota geratu dena, eta esperantza izaten laguntzen diguna”.

Bestalde, Aralarrek iragarri duenez, Herrizaingo sailburu Rodolfo Aresi eskatuko dio Legebiltzarrean azal ditzala Aralarren inguruan eta Gernikako akordioaren inguruan egin dituen adierazpenak, bai eta akordioaren alderdirik esanguratsuena, hau da, aldebakartasuna, zergatik baztertzen duen”.