Hemen zaude: Hasiera › Aktualitatea › Albisteak › Ezenarrok salatu du “Lopezen gobernuak langabezian daudenei zuzendutako ‘txoke planik’ ez gauzatzea”

Ezenarrok salatu du “Lopezen gobernuak langabezian daudenei zuzendutako ‘txoke planik’ ez gauzatzea”

2010/04/12
  • langabezia
  • ekonomia
  • ezenarro
Aralarren bozeramaile Aintzane Ezenarrok salatu egin du gobernuaren ekintza eza krisiari aurre egiteko orduan, eta Lopezen gobernuari “berehalako txoke erantzuna” gauzatzea eskatu dio, “langabezia agortu dutenei erantzuteko”. Ezenarrok, Radio Euskadin egindako elkarrizketan adierazi duenez, “azkeneko 30 urteetan izandako gobernurik identitarioena eta baztertzaileena izatetik harago, arlo ekonomikoan inkonpetentea den gobernu baten aurrean gaude”.

Aralarren legebiltzarkideak “krisiari erantzun sendo bat” emateko beharra aldarrikatu du elkarrizketan. Bere iritziz, “laguntza sozialak lehendik zetozenak dira, ez dago ezer berririk. Egiten ari direna lehen egiten zena da, gure ikuspegiko ez nahikoa. Hortik aurrera, gobernuaren geldotasunaren aurrean ematen diogun nota hutsa da”. Ezenarrok kritikatu egin du “azkeneko 30 urteetan izandako gobernurik identitarioena eta baztertzaileena izatetik harago, arlo ekonomikoan inkonpetentea den gobernu baten aurrean gaude”. Horren adibide aipatu du Ezenarrok “zorraren emisioarekin eta berehalakoan prestamua eskatu behar izateak agerian uzten du arlo ekonomikoan gobernuak darabilen jardun eskasa. Izan ere, horrez gainera, ez da herri honetan langabezian daudenei laguntzeko inolako neurririk hartu”.

Aralarren ordezkariak adierazi du bere taldeak hainbat aldiz aldarrikatu duela “langabezia saria agortu dutenei zuzendutako programa berezia abian jartzea” eta gogora ekarri du Legebiltzarrak, PPren aldeko botoekin, onartu zuela sektore horri zuzendutako programa berezia sustatzea. “Baina ez da ezer ere egin eta ez zaie behar bezala erantzuten langabeziaren drama bizitzen ari diren herritarrei, diru sarrerak bermatzeko legeak jasotzen dituen laguntzetatik harago. Gaur egun lege hori onartu zenean baino egoera larriagoan gaude eta erantzun sendoa eskatzen du horrek, txoke-erantzuna, baina gobernua ez dabil era horretako neurririk hartzen”.