Hemen zaude: Hasiera › Aktualitatea › Albisteak › Ezenarro: “Har ezazu dagokizun ardura, eta eskaini gizarteari, zehaztasuna, ekimena, lidergoa eta ausardia zerga politikaren gaineko ezinbesteko eztabaidari ekiteko”

Ezenarro: “Har ezazu dagokizun ardura, eta eskaini gizarteari, zehaztasuna, ekimena, lidergoa eta ausardia zerga politikaren gaineko ezinbesteko eztabaidari ekiteko”

2010/03/12
  • fiskalitatea
  • ezenarro
  • lopez
  • zerga
“Gaur kontroleko plenoan emandako erantzuna erabat eznahikoa izan da. Lopezek ez du inongo zehaztasunik eman hainbeste aldiz iragartzen duen fiskalitatearen inguruko eztabaida nola egingo asmo duen. Berriz ere azaleko argumentuetan geratu da”, salatu du Aralarren bozeramaile Aintzane Ezenarrok.

“Har ezazu, eta eskaini gizarteari, zehaztasuna, ekimena, lidergoa eta ausardia zerga politikaren gaineko ezinbesteko eztabaidari ekiteko”. Halaxe eskatu dio Aralarren bozeramaile Aintzane Ezenarrok Patxi Lopezi. Fiskalitatearen gainean “behin eta berriro egin asmo duen eztabaidaren iragarpenaren zehaztasunak ematea” erreklamatu dio Ezenarrok kontroleko plenoan. “Han eta hemen eztabaida egin behar dela esatetik harago, zehaztasunak ematea, ekimena hartzea, lidergoa bere egitea eta lehentasunezko bazkide duen PPri aurre egiteko ausardia izatea” eskatu dio Lopezi. Izan ere, Ezenarroren iritziz, “lehendakari batek ezin du lau urte eman guztion arteko eztabaida egin behar dela esaten eta gero ezer ez egin”.

“Ezkerreko izena izan, baina, aldi berean, eskumako politikak egiteko tentazioa duen gobernuak sinplekerietan aritzen garela leporatzen digu besteoi, apriorismoekin jokatzea. Baina BEZ igotzea edo ondareen gaineko zerga kentzea, argi dago ez dela inondik inora zerga politika birbanatzailea”, gogorarazi dio Ezenarrok Lopezi. Hori dela eta, horretaz guztiaz hitz egiteko prestutasuna adierazi dio Ezenarrok Lopezi, baina “ezinbesteko eztabaida horri ekiteko, eguna, metodologia eta parte-hartzaileak zehaztea” eskatu dio lehendakariari, “gaur kontroleko plenoan emandako erantzuna erabat eznahikoa izan baita. Lopezek ez du inongo zehaztasunik eman hainbeste aldiz iragartzen duen fiskalitatearen inguruko eztabaida nola egingo asmo duen. Berriz ere azaleko argumentuetan geratu da”.