Hemen zaude: Hasiera › Aktualitatea › Albisteak › Ezenarro: “Genero indarkeria da gaur egun Euskadin hiltzen duen indarkeria”

Ezenarro: “Genero indarkeria da gaur egun Euskadin hiltzen duen indarkeria”

2010/11/18
  • indarkeria
  • matxista
  • ezenarro
Aralarren bozeramaile Aintzane Ezenarrok, Zarautzen hilda agertu zen umearen gertaeraren haritik, ekimena aurkeztu zuen Legebiltzarrean, “babes programen protokoloek hutsuneak dituztela agerian geratu zelako”. “Protokoloak bete baziren ere, hutsuneak egon zirela agerian geratu zen, eta ez dugu ikusi erakundeen aldetik inongo autokritikarik, ezta gaizki egindakoak zuzentzeko borondaterik ere. Hain justu horixe beharrezkoa ikusten genuelako ekarri genuen ekimena Legebiltzarrera”, azaldu du Ezenarrok, “agerian geratu baita genero indarkeria dela Euskadin hitzen duen indarkeria”.

 

Horren aurrean, “tentsio gehiago” eskatu dio Jaurlaritzari. Izan ere, Legealdia hasi zenetik ez da behin ere bildu Etxeko tratu txar eta sexu-erasoen biktima diren emakumeei eskaintzen zaien laguntza hobetzeko Erakundeen arteko Akordioaren Jarraipen Batzordea. “Are gehiago, Aralarrek egindako eskariari esker deitu omen da bilera gaurko. Horregatik diogu ez dagoela behar den tentsiorik gaiari heltzeko erakundeen aldetik. Legebiltzarrera ekarri behar izan dugu eskaria genero indarkeriaren kasuetan aplikatzen diren protokoloetan atzeman diren hutsuneei aurre hartzeko”. Ezenarrok azaldu duenez, “Zarautzekoaren ondotik Aralarren gutxienez hutsune bi sumatu ditu protokoloetan: harrera etxeak uztea erabakitzen duten emakumeen egoeraren berri izateko erakundeek nolabaiteko jarraipena egin beharko luketela eta tratu txarrak egon diren familietako adin txikikoei babesa gehitu beharko litzaiekeela”.

Era berean, Aralarren bozeramaileak eskertu egin du Legebiltzarreko taldeek ekimenak aurrera egin dezan lortutako akordioa eta “erakundeek beren kabuz egin beharko luketena egin dezaten balio izan badu ekimena hartzeak, zerbaitetarako balio izan du orduan”.