Hemen zaude: Hasiera › Aktualitatea › Albisteak › Ezenarro: “Epe ertainera gure helburua da ezkerreko alternatiba abertzalea gobernu alternatiba bihurtzea”

Ezenarro: “Epe ertainera gure helburua da ezkerreko alternatiba abertzalea gobernu alternatiba bihurtzea”

2010/03/31
  • Ezenarro
Aintzane Ezenarro Aralarreko legebiltzar taldeko bozeramailea Elgoibarko Kultur Etxean izan zen atzo arratsaldean, ‘Ezker abertzale politikoaren etorkizuneko erronkak’ izenburuko hitzaldia eskaintzeko. Ezenarrok esan zuenez, “epe ertainera gure helburua da ezkerreko alternatiba abertzalea gobernu alternatiba bihurtzea, ez egoteko beti EAJ edo PSE gobernuen artean aukeratu beharra, edo herritarrek ez dezaten bi aukera horiek bakarrik izan”.

“Soziologikoki posible da”, azpimarratu zuen Ezenarrok, “herritar asko gaudelako espazio horretan. Indarkeriak ez du utzi gobernu alternatiba izatea ezker abertzalekoa, baina iruditzen zaigu epe ertainean hori posible izango dela eta horren alde lan egin behar dugu”.

 

Aralarreko legebiltzarkidearen arabera, honek eskatzen du egoeraren diagnostikoa egitea. Gaurko errealitatean hiru ezaugarri nagusi daudela azaldu du: “Demokraziaren historiatik hona, lehen aldiz abertzale guztiok gobernu nagusietatik kanpo gaude, Nafarroan eta EAEn; bestetik, eztabaida prozesuak gora behera, gaur gaurkoz ETAk indarrean jarraitzen du, eta ETAren indarkeriaren zama pairatzen jarraitzen dugu; hirugarrenik, ezin dugu ahaztu azken urteotan bizi dugun krisi ekonomikorik latzena bizi dugula”. Nabarmendu duenez, “egoera horretan kokatu behar dugu gure lana, ezkerreko alternatiba abertzalea gobernu alternatiba bihurtu ahal izateko”.

 

Eusko Jaurlaritzaren osaeraz ere mintzatu da. “PSE-PPren gobernua gutxiengotik egindakoa da, eta frentista eta espainolista da, horri oposizioa egin behar zaio ikuspegi euskaltzale, abertzale eta ezkerreko batetik”. Era berean,  Jaurlaritzak ezkerreko politikarik ez duela egiten eta bere kudeaketa ekonomikoa kritikatu ditu Ezenarrok. “Gobernu honen zorpetzearen bidea hartu du finantzazio arazoei aurre egiteko, ezkerreko bidea hartu beharrean, hau da, politika fiskalean aldaketak egitea eta zerga politika goitik behera aldatzea. Horrek eragin du inoiz baino zorpetuago dagoen Eusko Jaurlaritza izatea. Hori urte batean bakarrik. Hemendik lau urtera egoera oso larrian egon gaitezke. Jaurlaritzaren politika ekonomikoa negargarria da”.