Ezenarro: “Baliabide publikoen galera ekiditeko hartu behar dugun bidea iruzur fiskalaren aurka borrokatzea da, ez –PPk egiten duen moduan– iruzurraren zalantza sektorerik ahulenen gain jartzea”

“Talde popularrak egindako laguntza sozialetako iruzurraren gaineko ekimena fiskalitatearen gaineko eztabaida saihesteko” izatea leporatu dio Aralarrek PPri. “Fiskalitatearen gaineko eztabaida irekiz gero herri honetan dagoen benetako iruzurraren gaia aterako litzateke eta, hori ekiditeko, eztabaida desbideratu eta gizarte zerbitzuetan ematen den iruzurra erabili nahi izan du PPk, sektorerik ahulenengan jarriz iruzurraren zalantza. Hainbeste jende egoera larrian bizi denean PPk laguntza sozialetako iruzurraren mamua astindu nahi ikuspegi moral batetik begiratuta onartezina da”.

Aralarren bozeramaile Aintzane Ezenarrok adierazi duenez, “zerga eremuan dagoen iruzurra zerbitzu sozialetan dagoena baino askoz handiago da”. “Ados gaude baliabide publikoen galera ekidin behar dela baina bidea beste bat da, zerga politika eta eremu horretan dagoen iruzurra borrokatzea”. Ezenarrok:gogorarazi du 2007tik hona hartu diren erabaki fiskalen ondorioz diputazioek 1.300-1.500 milioi euro gutxiago jasotzen dituztela, eremu fiskaleko ikuskaritza %1koa dela, Belgikan, Alemanian edo Danimarkan %25a denean; laneko errentetatik jasotzen duguna  kapital errentetatik jasotzen dena baino gehiago dela;, eta errenta altuenek mekanismoak dituztela zerga gutxiago ordaintzeko. “Hori danok dakigu. Herri honetan dagoen iruzur fiskalik handiena da. Eta iruzur fiskalaren kontrako borroka da baliabide publikoen galera ekiditeko guztiok hartu beharko genukeen dugun bidea”, gehitu du Ezenarrok.

Horren haritik, Patxi Lopezi eskatu dio”PPren eskarietatik harago, ekin diezaiola zerga-politikaren gaineko eztabaidari eta “eguna eta ordua jar dezala” eztabaida horri ekiteko.