Hemen zaude: Hasiera › Aktualitatea › Albisteak › Euskarazko kalitatezko telebistaren edukiak guztion artean eztabaidatzeko eskatu du Aralarrek

Euskarazko kalitatezko telebistaren edukiak guztion artean eztabaidatzeko eskatu du Aralarrek

2010/02/10
  • ETB
  • Basabe
ETBren zuzendaritzak berretsi egin du, Legebiltzarrean, ETB4 aurten jarriko duela martxan. Horren haritik, Aralerreko Legebiltzarkide Mikek Basabek adierazi du "euskarazko telebista kateen edukien inguruan hausnarketa sakona egiteko aukera paregabea" dela oraingo hau. "Eztabaida hori", gaineratu du Basabek, "ez daiteke etxe barruan bakarrik egin, gizartera zabaldu beharra dago".

EiTBren Zuzendari Nagusi Alberto Suriok Aralarren galdera bati erantzunez gaur Legebiltzarrean esan duenez, "barne hausnarketa prozesu bat abian dago", euskarazko kalitatezko telebistak izan beharreko edukien gainean. "Euskarazko telebista kalitatezkoa behar dugu, ikusle guztientzat egokia izango dena, ez kirolzale eta 16 urtetik beherakoentzat bakarrik", zehaztu du Aralarreko Legebiltzarkide Mikel Basabek.

Hausnarketa taldean “EiTB barruko iritziak bakarrik kontuan hartu beharrean, kanpotik izan daitezkeen ekarpenei irekita egotea” eskatu dio Basabek EiTBko zuzendaritzari. Gainera, Aralarren iritziz “hausnarketa hori ezin daiteke hausnarketa orokor baten barruan sartu, ETBk euskara eta kalitatea nola uztartu behar duen inguruan egin behar da, beren beregi”, adierazi du legebiltzarkideak.


Basaberen iritziz, "ETB1en eskaintza ez da egokia, azkeneko urteetan okerreko bidean sartu da, eta orain dugun aukera erabili egin behar da, euskal hiztunok merezi dugun telebista izan dezagun". Aralarreko kidearen esanetan, "ikusle-kopuruak behera egin du, euskaldunon kopuruak gora egin duen bitartean; argi dago eskaintzak ez duela eskatzaileen gogoa asebetetzen". "ETB3 martxan egoteak eta ETB4 aurtengo aurreikusita egoteak aukera ematen digu ETB1 kirol eta marrazki bizidun emisio-orduz arintzeko eta bertan programazio osoa eskaintzeko".

 

ETBko zuzendari nagusi Alberto Suriok Eusko Legebiltzarrean irailean egindako adierazpenak gogoratu ditu Basabek. Suriok hausnarketa taldea beharrezkoa zela esan zuen errealitate berrira egokitzeko, audientzia berreskuratzeko eta kalitatezko euskarazko edukiak indartzeko. Hori guztia lortzeko, Aralarren iritziz, “zuzenena eztabaida sozializatzea da, eta ez telebistaren baitako prozesu huts bihurtu”.