Euskararen erabilera normalizatzeko plangintza espezifikoak egin dituzte Donostiako Udaleko zuzendaritza guztiek

2008ko apirilean 2012ko abenduaren 31 bitartean indarrean egongo den Euskararen Erabilera Normalizatzeko Laugarren Plangintza Aldia onartu zuen Donostiako Udalak.  Horren ostean,  Euskararen Udal Patronatuaren koordinaziopean, plangintza hori garatzeko Hizkuntza Ofizialen Erabilera Batzordeak sortu ziren, zuzendaritza bakoitzean. Batzorde bakoitzaren egitekoa zuzendaritzari egokitutako plangintza garatzea izan da (helburuak zehaztea, ekintzak aurreikustea, gauzatzeko bideak adostea…) - beti ere  Laugarren Plangintza Aldiak ezarritako jarraibideetan oinarrituta - eta honen jarraipena ere bere gain hartuko du aipatu batzordeak plangintza amaitu bitartean.  

Donostiako Udalean estreinakoz sortu diren batzorde horiei esker zuzendaritza bakoitzaren egoera eta premiak hobeto ezagutzea lortu da eta tresna oso baliagarriak dira euskararen erabileran urrats eraginkorrak ematen jarraitzeko.   

Laugarren Plangintza aldia oinarri

Laugarren Plangintza Aldian Donostiako Udalaren administrazioaren jarduera, prozedura eta elementu guztietan bi hizkuntza ofizialen erabilerarako irizpideak zehazten dira. Hau da, ahozko eta idatzizko komunikazioetan, itzulpenetan, langileen prestakuntzan, programa informatikoetan, internet eta intraneten, hizkuntza paisaian, publizitatean, diru laguntzak esleitzerakoan, kontratazio administratiboetan, bide publikoetan egiten diren jardueretan eta lagatako lokaletan.  

Horrela, Euskararen Erabilera Normalizatzeko Batzorde bakoitzak dagokion zuzendaritzarako egin duen plan espezifikoa aipatu irizpideak kontuan hartuta egin du.  
 
 
 

Helburu orokorrak

Plan honen helburu orokorrak honako hauek dira: 

• Donostiako Udalak herritarrekin dituen harremanetan, ahoz zein idatziz, bi hizkuntza ofizialak erabiltzeko aukera bermatzea.
• Euskararen ahozko erabilera areagotzea, herritarrekiko jarduna erabat bermatuz eta Udal barruko lan harremanetan erabilera handituz.
• Euskararen idatzizko erabilera areagotzea, sorkuntzari lehentasuna emanez.
• Langileen hizkuntza-gaitasuna handitzea.
• Irudi korporatiboan eta hizkuntza paisaian bi hizkuntza ofizialen presentzia osotasunean bermatzea.

Helburua, beraz, ezagupenetik benetako erabilerara igarotzea da, hau da, administrazioak eta langileek beraiek euskalduntzeko eta alfabetatzeko egindako ahaleginari etekina ateratzea eta udal administrazioaren esparru guztietan euskararen erabilera areagotzea  
 

Administrazio elebidun baterantz

Ainhoa Beola zinegotziaren esanetan “Herritarren hizkuntza-eskubideak bermatu ahal izateko bideak jarri behar dira hizkuntzen benetako berdintasun orekatura iristeko, eta hori lortze aldera, bereziki zainduko da herritarrari lehen atentzioa ematea, herritarrak berak hautatutako hizkuntzan eta inolako deserosotasunik eragin gabe Udalarekin harremana izan dezan”.