EAEko Harrobien lehenengo Lurralde Plan sektoriala egingo du gobernuak, Aralarren ekimenez

Eusko Legebiltzarreko alderdi guztien aldeko botoei esker onartu da  gaur  Harrobien Lurralde Plan sektoriala  egitea. Aralarren ekimenak, besteak beste, harrobiak non kokatu beharko diren zehaztu beharra eskatzen du, ondare kulturala eta naturala babesteko . “Gaur egun planifikazio gabe eta legedia zaharkituaren arabera baimentzen dira ustiaketak”, azaldu du Aralarren legebiltzarkide Dani Maeztuk, “eskaria eta eskaintza uztartzen dira soilik”, gaineratu du.

Maeztu legebiltzarkideak zenbait arrazoi aipatu ditu plana “ezinbestekotzat” jotzeko. Alde batetik, “sektorea egituratzeko eta ordenatzeko beharrizana dago; planifikazio ezak garamatza egoera anarkiko hau izatera”. Legebiltzarkidearen iritziz,  “horrek ondare naturala eta kulturala hondatzea dakar”. Ingurumenak pairatzen duen eragina txikitze aldera, hain zuzen ere, Aralarrek beste iturri batzuk erabiltzea proposatu du: “botatako eraikuntza eta azpiegituretako edo eraikuntzako hondarrak erabili daitezke, betetze lanak edo hormigoia egiteko;  birziklatze horrek harrobietatik ateratzen den harri kantitatea murriztuko luke”.

Aralarrek azaldu duenez, dugun garapen ereduaren inguruko eztabaida sustatzea ere garrantzitsua da. “Beharrezkoa da eskaria arrazionalizatzea. Eraikuntzan eta obra publikoan oinarritzen badugu eredu ekonomikoa jakin behar dugu horrek ondorioak dakartzala, eta Inguruan, paisaian, akuiferoetan eta kutsadura atmosferikon eragiten duela”, esan du Maeztuk. Bukatzeko, “interes orokorra interes partikularren gainetik jartzeko lanean“ jarraituko duela esan du Maeztuk . Horren harira, martxoan zehar eztabaidatuko den beste proposamen bat ekarri du gogora legebiltzarkideak: “harrobi abandonatuak leheneratzeko” ekimena.