Hemen zaude: Hasiera › Aktualitatea › Albisteak › Basabe: “Aldaketaren gobernu izan gura zuen horrek, PPren eskutik eta UPyDren itzaletik dakarkigu aldaketa”

Basabe: “Aldaketaren gobernu izan gura zuen horrek, PPren eskutik eta UPyDren itzaletik dakarkigu aldaketa”

2012/01/24
  • Euskara
  • Basabe
  • Legebiltzarra
  • Hizkuntza Politika
Halaxe leporatu die sozialistei Aralarren legebiltzarkide Mikel Basabek, saltoki-gune handietan euskaraz aritzeko eskubidea bermatzen zuen legea aldatzea onartu dutelako. Plenorako geratu da, beraz, gaurko batzordearen ostean, merkataritza legearen aldaketa. Aralarrek zuzenketak gordeko ditu plenorako.

Euskara inposatzen den hizkuntza dela gezurtatu egin du Basabek gaurko batzordean izandako eztabaidan. Are gehiago, konstituzioaren 3. artikulua gogora ekarriz, “inposatzen den hizkuntza bakarra gaztelania” dela adierazi du eta, beraz, “gezurra” dela sozialistek erabili duten planteamendua, hau da, derrigortasunak kontrakotasuna eragiten duela; “zeren, guztiok gaztelania jakitera derrigortuta egon arren, ez dut ikusten, nik behintzat, gaztelaniaren kontrakotasunik ganbera honetan; zoritxarrez, ez dakit gauza bera esan daitekeen euskararen inguruan”. Gauzak horrela, Basaberen iritziz, legea aldatzeko sozialistek hartu duten erabakiaren atzean “beste arrazoi batzuk daude”; alegia, “Lehendakariak berak behin eta berriz azpimarratu arren bere gobernuaren asmoa dela euskararen erabilera askatasunean sustatzea, behin eta berriro neurriak hartzen ari da hain justu euskaldunok euskara askatasunean aukeratzeko aukerarik izan ez dezagun”. Hori dela eta, Basabere ustez –eta aurten 30 urte beteko dituen euskararen legeak ere onartu arren euskal herritarrok merkataritza arloan euskaraz aritzeko daukagun eskubidea–, “Lopezen gobernuak justu kontrako erabakia hartu du eta horren atzean dagoen helburu eta arrazoi bakarra da aldaketaren gobernu izan gura zuen horrek aldaketa dakarkigula PPren eskutik eta UPyDren itzaletik”.

Aralarrek mantendu egin ditu zuzenketak, plenoan eztabaidatu eta bozkatu daitezen, zuzenketa bat bera ere ez delako onartu batzordean.