Hemen zaude: Hasiera › Aktualitatea › Albisteak › Argi-kutsadura arautu beharko du Jaurlaritzak, Aralarren ekimenez

Argi-kutsadura arautu beharko du Jaurlaritzak, Aralarren ekimenez

2010/06/10
  • Maeztu
  • Ingurumena
Eusko Legebiltzarrak Eusko Jaurlaritzari argi-kutsadura murrizteko arautegia garatu dezala eskatu dio gaurko osoko bilkuran. Aralarrek, PPrekin batera, aurkeztutako proposamenak jasotzen du kutsadura mota horrek atal berezia izan dezala aldaketa klimatikoaren inguruan Jaurlaritza egiten ari den legean. Aralarrek aurreko legegintzaldian argi-kutsadura zuzentzeko lege proposamena egin zuen eta berau garatzeko lan taldea ere jarri zen martxan Legebiltzarrean. Legegintzaldia amaituta, ordea, bertan behera geratu zen eta horregatik ekin nahi izan diote atzera ere lanari. Aralarrek eta PPk aurkeztu zuten ekimena, eta gaur, aho batez, aurrera egin du proposamenak.

Aralarrek aurreko legegintzaldian argi-kutsadura murrizteko hasi zuen bideari jarraipena eman dio gaur. Kutsadura mota hori murrizteko aurkeztutako legez besteko proposamena onartu du Eusko Legebiltzarrak. Horren harira, Eusko Jaurlaritzari argi-kutsadura murrizteko arautegia garatzea eskatzen zaio Aralarrek, Alderdi Popularrak eta Alderdi Sozialistak adostu duten testuan. Aipatutako arautegiak atal berezia izango du Jaurlaritza erredaktatzen ari den aldaketa klimatikoaren lege  proiektuan. “Aurrerapauso garrantzitsutzat eta beharrezkotzat” jo du erabakia Aralarren legebiltzarkide Dani Maeztuk, “aurreko legegintzaldian Aralarrek hasi zuen bideari jarraipena ematen zaio”, adierazi du.  

 

Hiru arrazoi eman ditu Aralarren legebiltzarkideak argi-kutsadura arautzeko garrantzia azaltzeko. “Alde batetik, energia kontsumoan eragingo du eta horrek CO2 isurketak murriztuko ditu, ingurumenean onura nabarmena ekarriz; bestetik, herritarren osasunean ere eragingo du, lo egiteko eta iluntasunean egoteko eskubidea errespetatuko delarik; eta, hirugarrenik, gaua bere osotasunean disfrutatzeko eskubidea errespetatuko da, gauez garatzen diren ekosistemei eta argiteria artifizialak kaltetzen dituen ekosistemei ere mesede egingo die, bioaniztasuna errespetatuz”, azaldu du Maeztuk.