Aralarren iritziz, laguntza sozialak jasotzeko baldintzak gogortzeko aprobetxatu dute diru sarrerak bermatzeko legearen modifikazioa

“Lege aldaketak laguntza sozialen kudeaketa erakunde berriari egokitzea helburu zuen arren, argi geratu da, sakonean nahi dutena izan dela laguntza sozial horiek jasotzeko baldintzak gogortzea eta gizarte laguntzen hartzaileen unibertsoa murriztea, PPren presioei amore emanez”. Hori dela eta, “ezinbesteko deritzogu saileko arduradun nagusia den Gemma Zabaletak laguntzen kudeaketa-sistema aldatzeko hasierako helburuari diru-laguntza horiek jasotzeko baldintzen gogortzea zergatik gehitu dion azal dezan”.

Are gehiago, Ezenarrok galdera zehatza ere egingo dio Zabaletari, azal dezan “zein neurri hartuko duen gure gizartearen parte diren, eta orain arte baldintza jakin batzuetan gure babes-sistemak ziurtatzen dituen diru-sarrerak bermatzeko errentaren jasotzaileak izan diren, hainbat eta hainbat pertsona babes publikorik gabe gera ez daitezen”.

Horrez gainera, Ezenarrok, ahoz erantzuteko bigarren galdera ere egingo dio Zabaletari. Izan ere, Jaurlaritza sostengatzen duen alderdi sozialistaren eta bere lehentasunezko bazkidea alderdi popularraren arteko akordioari esker, diru-sarrera bermatzeko errentaren jasotzaileak aurrerantzean ezin izango diolako uko egin lan eskaintza bati, prestazioa galdu nahi ez badu, behintzat. Ezenarrok uste du baldintza hori ez duela sailak behar bezala zehaztu. Hori dela eta, galdera luzatuko dio Zabaletari kontroleko plenoan, “behingoz argitu dezan, zertaz ari den egokia den enpleguaz hitz egiten duenean”. Izan ere, Aralarren bozeramailearen ikuspegiko “enplegu zerbitzu publikoak kalitatezko enplegu duina lehenetsi behar du, bai politika publikoen bitartez zein lan eskaintza publikoen bitartez, sarri askotan lanaren egokitasuna eta duintasuna ez datozelako bat”.