Hemen zaude: Hasiera › Aktualitatea › Albisteak › Aralarren iritziz, “arduratzekoa da gobernuaren aurrerako ihesaldia” eta “bere gezurrak sinetsi izana”

Aralarren iritziz, “arduratzekoa da gobernuaren aurrerako ihesaldia” eta “bere gezurrak sinetsi izana”

2010/05/05
  • ezenarro
  • lopez
  • gobernua
Aralarren bozeramaile Aintzane Ezenarrok kritikatu egin du Patxi Lopezen gobernuak bere lehenengo urteaz egin duen balorazioa. Bere irudikoz, “gobernua bide oso arriskutsu eta kezkagarrian sartzen ari da aurrerabidean ihesi; ez du errealitatea errekonozitzen eta okerrena da bere gezurrak sinistera heldu dela”. “Euskal gizarteak aldaketa lasaia barneratu duela esan izanak agerian uzten du ze urruti dauden euskal gizartetik. Sinetsi egin dute aldaketa horixe zela gizarteak nahi zuena, euskal gizartea justu kontrakoa esaten ari denean behin eta berriz”, adierazi du Ezenarrok.

 

Aralarren bozeramaileak salatu duenez, “gobernuak ez du elkarrizketarik sustatu, PPrekin ez bada, eta harrokeriaz jardun du gai nagusienen inguruan erabakiak hartzeko orduan. Hala, aurrekontuetan ez zuen ezer adostu, gehiengoa baztertzen eta zatitzen duten elementu sinbolikoen inguruan ere ez du elkarrizketarik sustatu eta horren adibide esanguratsua da bake hezkuntza planaren birformulazioaren kasua”. Ezenarrok salatu egin du, “elkarrizketari uko egin eta harrokeriaz jarduteaz gainera, bai lehendakaria zein, legebiltzarreko bozeramaileak eta bere lehentasunezko bazkideen presidenteak formak galdu dituzte, oposizioaren deskalifikazio pertsonaletara iristeraino”.

Azkenik, “deigarritzat” jo du gobernuak bere lehenengo urtebetetzean “autoafirmazioan erori izana, eta aurrekoak baino hobeto egin duela esateko premia sentitzea”. “Behin eta berriz aurreko gobernua aipatzen jardun behar izateak segurtasun eza eta bere jendearen aurrean berresteko duen beharra adierazten du”.