Hemen zaude: Hasiera › Aktualitatea › Albisteak › Aralarren galderari erantzunez, Osasun sailak gezurtatu egin du klenbuterolaz kutsatutako ganadua hil denik EAEn

Aralarren galderari erantzunez, Osasun sailak gezurtatu egin du klenbuterolaz kutsatutako ganadua hil denik EAEn

2011/11/25
  • Maeztu,Salud
  • Osasuna
  • Maeztu,Ingurumena
  • Ingurumena
Aralarrek kritikatu egin du Eusko Jaurlaritzak gaiaren inguruan izan duen jarrera. “Ez da gai izan zer gertatu den argitzeko, Aralarrek gaia Legebiltzarrera ekarri duen arte”, kritikatu du Aralarren legebiltzarkide Dani Maeztuk. “Okelaren sektorearen defentsa egiteko azalpenik ez ematea” leporatu dio legebiltzarkideak.

Aralarrek bigarren aldiz galdetu dio Eusko Jaurlaritzari EAEn klenbuterolaz kutsatutako ganadua hil dela adierazten duten albisteen inguruan. Alberto Contador txirrindulariari klenbuterol aztarnak topatu zizkioten 2010ean eta berak Euskadin erositako okelari leporatu zion errua. Marca kirol egunkariak joan zen astean albistea argitaratu zuen gai horren inguruan. Erralde hiltegiko akta bat agertzen zen albistean eta klenbuterolaz kutsatutako ustezko positibo baten berri ematen zuen.

Osasun sailburuak gezurtatu egin du dokumentu horrek ustezko positiboa egiaztatzen duenik. “Dokumentu hori lehenengo azterketa baten ondorioa da. Gero, beste hiru kontra-analisi egiten dira eta negatibo eman zuten”, adierazi du Rafael Bengoak. “EAEn kalitate handiko sistemak ditugu azterketak egiteko eta Europar Batasunak ezartzen dituen kalitate mailaren gainetik kokatzen gara. 12 urte daramatzagu klenbuterolaz kutsatutako positiborik izan gabe”, gaineratu du. “Euskadin ez da klenbuterola erabiltzen ganadua hazteko”, esan du.

Aralarren legebiltzarkide Dani Maeztuk Jaurlaritzak gaiaren inguruan izan duen jarrera kritikatu du. “Kontu horrek euskal abeltzaintzaren izena zikindu du, konkretuki hiltegien izena, eta aipatzen den hiltegia kaltetu du bereziki”, azaldu du Maeztuk. “Eusko Jaurlaritza ez da gai izan gaia kudeatzeko; ez du erantzunik eman eta ez du ezer argitu legebiltzar talde honek  galdera Legebiltzarrera ekarri duen arte”, salatu du.  Era berean, Bengoari leporatu dio "Legebiltzarreko tribunara agertu izana ez aprobetxatzea sektoreari azalpenak emateko behar den bezalako erantzuna ez eman izanagatik".