Aralarren Ezkerraberri Fundazioak ilegalizatutako Kurdistango DTP alderdiko diputatu Ibrahim Binicirekin hitzaldia egingo du bihar Bilbon

Joxemari Ostolaza Ezkerraberri Fundazioko arduradunak azaldu duenez. “Independentistak eta ezkertzaleak diren pertsonak biltzen dituen foro parte-hartzailea da Ezkerraberri fundazioa. Euskal Herriak behar duen subiranotasun nazionala lortzeko oinarriak jarriko ditu fundazioak, beti ere independentismoaren ikuspegitik. Aldaketa soziala aldarrikatuko du, ikuspegi ekosozialista batetik. Eta hori guztia egingo du ikuspegi ireki batetik eta, beti ere, herritarrenganako hurbiltasuna galdu gabe”.

Ezkerraberri fundazioaren bitartez hainbat helburu gauzatu nahi ditu Aralarrek, azpimarratu du Rebeka Ubera Aralarreko antolaketa idazkariak. “Besteak beste, Euskal Herriaren subiranotasunaren inguruko debatea sustatu nahi du, eta berau lortzeko bideak bultzatu. Horrekin batera, Euskal Herriko gizartean bizi-bizirik dauden hainbat gairen inguruko eztabaida sustatu nahi du: feminismoa, ekologia, gaztedia, garapen eredua, eredu ekonomikoa, euskara eta euskal kultura, immigrazioa, demokrazia parte-hartzailea, memoria historikoa, giza eskubide indibidualak eta kolektiboak…”. “Azken baten, Aralar alderdiak duen jarduera eta ideologia gizarteratzea izango da Ezkerraberri fundazioaren helburua”, gaineratu du Ostolazak.

Ezkerraberri fundazioak bereziki landu eta sakonduko dituen gaien artean dago giza eskubideena dela esan duteOstolazak. “Giza eskubideak bere osotasunean hartuta, eta inongo bazterkeriarik gabe, fundazioak ere bere egiten duelako Aralarren lelo nagusietako bat: ‘Ideia guztiak, pertsona guztiak’. Bereziki garatuko diren giza eskubideen artean daude herri bezala ditugun eskubide kolektiboak (erabakitzeko eskubidea, esaterako), eskubide zibil eta politiko kolektiboak eta norbanakoarenak, adierazpen askatasuna, bizitza duina izateko eskubidea, etab”.

Horrekin batera, Euskal Herriko ezker independentista, zibil eta zabala, egituratzeko argudioak eta ideiak sortzeko asmoa ere izango duela fundazioak esan dute, eta Euskal Herriko ezkerreko independentistak diren pertsonei prestakuntza ideologikoa eskaintzea. Horretarako hainbat bide lantzeko asmoa dauka fundazioak: hitzaldiak, ikastaro monografikoak, tailer tematikoak…

DTPko Ibrahim Biniciren hitzaldiaz gainera, hurrengo asteetarako beste bi ekitaldi egitea aurreikusita dauka Ezkerraberri Fundazioak. Martxoaren 12an, Emakumeen Nazioarteko Egunaren harira, prostituzioaren inguruko jardunaldiak izango dira, arratsaldeko 19:00etan. Deustuko Bidarte gizarte etxean. Martxoaren 16an, berriz, elektropoluzioaren inguruko jardunaldiak izango dira, Bilboko Arrupe Etxean.