Aralarrek salatu du sektore batzuk Bilboko jaietako eredua eta giroa nahasi nahi dutela
Hurrengo irailaren 9an Txori Barrote konpartsako lau kide epaituko dituztela eta, Aralarrek salatu nahi du sektore batzuk Batasunaren inguruan mugitzen den guztia epaitegietara eramateko daukan obsesioa. Iosu Murgia Bizkaiko Aralarreko koordinatzaileak adierazi duenez, “obsesio horrekin adierazpen askatasuna bezalako oinarrizko giza eskubideak urratzea lortzen dute bakarrik, eta azkenean, ez dituzte delituak epaitzen, baizik eta jarrera eta ideia politikoak”.
Aralarren ustez, zenbait lobbyk interes berezia dute Bilboko jaietako ereduarekin amaitzeko, zeinak txosnak eta jaigune berezia duten motorea. “Era honetako prozesuekin giroa nahasi nahi dute bakarrik, eta atzean dagoena Bilboko jai ereduarekin amaitzeko asmoa dago”, esan du Murgiak.
Eskubide zibil eta politikoak urratzen dituzten epaiketa-prozesuak geldiarazteko eskaera egin du berriro Aralarrek eta alde guztiek giza eskubideak errespetatuko dituzten bideak zabaltzea eskatu du, era horretara Euskal Herriak eskatzen duen bake prozesua abian jarri ahal izateko.