Aralarrek salatu du Lopezen gobernuak uko egin diola “besteekin hitz egiteari ere, esaten duena eta egiten duenaren arteko distantzia agerian utziz”

Aralarrek ia 471 zuzenketa aurkeztu dizkio EAEko 2010eko aurreko proiektuari, “ezkerretik, abertzaletasunetik eta euskaltzaletasunik”, Ezenarrok azaldu bezala. “Guztiontzat egin nahi zuen gobernuari ekarpenak egin nahian aurkeztu genituen zuzenketa partzialak, baina izugarri larria iruditzen zaigu oposizioko taldeekin hitz erdi bat bera ere ez egin izana. Horrek erakusten du 25 parlamentarik osatzen duten alderdi sozialistak gainontzeko taldeekiko duen harrokeria eta alderdi popularrarekiko duen menpekotasuna”, salatu du Aralarren bozeramaileak.

Aurrekontuei Aralarrek aurkeztutako osoko zuzenketaren ondoren, ekonomia sailburuaren aldetik dei bat egon dela baieztatu du Ezenarrok. Aralarrek “aurrekontu ikuspegitik eta politikoki ze tarte dagoen galdetu arren, gaur da eguna erantzunik ere ez duguna jaso”. Hori da gobernu honen jarrera, harrokeria eta menpekotasuna; esaten duenaren eta egiten duenaren artean duen aldea agerian utziz”. Ezenarrok gogor salatu du “guztiontzat gobernua izango zela esanez etorri zen Patxi Lopez, elkarrizketaren gobernua izango zela esanez, baina erakutsi du Aralarrekin, eta oposizioko beste taldeekin ere, ez duela adostasuna lortzeko saiakerarik ere egin”.

Aralarren bozeramaileak PSEri leporatu dio “herri honen gehiengoak defendatzen dituen kulturaren, hizkuntzaren eta herri proiektuaren gainetik gutxiengoak defendatzen duen “normaltasuna, hots nortasun espainiazalea, ezarri nahi izatea”. “Jakina da herri ikuspegi ezberdina duguna, baina gobernuak, elkarrizketaren gobernuak, ez du gutxieneko elkarrizketa bat egin nahi izan, ezta gutxieneko akordio puntualetara heltzeko ere”, gehitu du Ezenarrok. Ildo berean, talde popularrari “argi hitz egitea” eskertu dio “sozialistak disimulatu ezinik ari direlako, eta aldiz  Danborenean jaunak argi utzi duelako egiten ari direna rebantxismoa dela”.