Aralarrek PSE eta PPri leporatu die, Hondarribiko aireportuaren handitzea “logika sozial, ekonomiko eta ekologikorik gabe” egin nahi izatea

Alderdi Sozialistak eta Alderdi Popularrak bat egin dute eta atzera bota dute Aralarrek, EAJk eta UPyDk eskatu duten Hondarribiako aireportuaren luzapena egiteko moratoria eskaera. Hiru taldeek sinatu dute Aralarrek aurkeztu zuen proposamenari egindako erdibideko zuzenketa. Aralarren jatorrizko ekimenak Jaurlaritzari eskatzen zion Hondarribiko aireportuaren luzatzeko egitasmoa bertan behera uztea eta, handitzearen inguruan erabakirik hartu aurretik, azter zezala alboan dituen aireportuekin egin dezakeen lankidetza eta ingurumenean eragin dezakeena.

Aralarren legebiltzarkide Dani Maeztuk salatu egin du PPk eta PSEk inongo daturik eman gabe egiten dutela euren diskurtsoa eta eskatu die “Gipuzkoako aireportua handitzeko sosik ez jartzea, inbertsio horrek logika sozial, ekonomiko eta ekologikorik ez lukeelako izango”. Maeztuk bere argumentazioa azaltzeko Eusko Jaurlaritzak egindako txostena izan du eskuartean. Ikerketa horren arabera, “aireportuak urtero-urtero bidaiariak galtzen ditu (2011ko azken hiruhilekoan %10,5eko jaitsiera izan du bidaiari kopuruan) eta AHT abian jartzen denean bidaiarien %37 galduko ditu 5 urtean”. “Datuek agerian uzten dute ez dela bideragarria  120 kilometrotan 4 aireportu edukitzea. Gainera, administrazio publikoa gero eta gutxiago biltzen ari da da eta Hondarribiko aireportuak  52 milioiko defizita dauka”, gaineratu du.

Era berean, Legebiltzarkideak Jaurlaritzari eskatu dio Txingudiko Hegaztientzako Babes Bereziko Gunearen kudeaketa plana behingoz onar dezala eta PSEri  diskurtsoa bikoitza egitea leporatu dio: “alde batetik, duplizitateak daudela esan eta hori ekiditeko lan egingo dutela esaten dute, bestetik, ordea, muzin egiten diote gastua murrizteko aireportua ez handitzeko proposamenari”.