Hemen zaude: Hasiera › Aktualitatea › Albisteak › Aralarrek Lopezi eskatu dio, lehenetsi ditzala hizkuntzen industrian ari diren euskal enpresak, Google konpainiari euskarazko baliabideak eman aurretik

Aralarrek Lopezi eskatu dio, lehenetsi ditzala hizkuntzen industrian ari diren euskal enpresak, Google konpainiari euskarazko baliabideak eman aurretik

2010/07/29
  • euskara
  • basabe
  • google
  • hizkuntza
Patxi Lopezek AEBra egindako bidaian Google konpainiarekin euskarazko itzultzailea garatu ditzan, euskarazko baliabideak bere esku uzteko hitzarmena lortu omen duela eta, Aralarrek gogorarazi nahi dio Lopez lehendakariari, “ondo iruditu arren Googlek euskarazko baliabideak garatzea, eta horretarako Jaurlaritzaren eta bestelako erakundeen laguntza eskaintzea baliabide linguistikoak lortzeko, Euskal Herrian lan horretan ari diren enpresek ere eskubide berberak izan beharko lituzketela”.

Mikel Basabe Aralarren legebiltzarkideak adierazi duenez, “lehentasuna izan beharko luke hizkuntzen industrian ari diren euskal enpresen lana bultzatzeak”. Basabek Lopezi gogorarazi dio, “Legebiltzarrak maiatzaren 6an adostu zuela Jaurlaritzari eskatzea, euskararentzako ahalik eta tresna linguistiko hoberenak lantzeko, Jaurlaritzaren eta erakunde autonomoen datu base linguistikoak gizartearen esku uztea”. Gainera, Zientzia, Teknologia eta Berrikuntzaren Planaren ildo estrategikoen artean ere hizkuntzen industria bultzatzea jasotzen da. Beraz, Basabek, Lopezi eskatu dio “lehenetsi ditzala tratu horretan jada lan horixe egiten ari diren euskal enpresak”. Aurreko egunetan IVAPen itzulpen-memorien zati bat erabilera publikoko egin izana bide horretan urrats egokia dela deritzo Basabek.