Hemen zaude: Hasiera › Aktualitatea › Albisteak › Aralarrek Lopez kritikatu du “titularrak ematetik harago ez duelako erabakirik hartzen”

Aralarrek Lopez kritikatu du “titularrak ematetik harago ez duelako erabakirik hartzen”

2011/07/21
  • fiskalitatea
  • ezenarro
  • diputazioakk
  • lopez
Aralarrek Patxi Lopez lehendakariari kritika egin dio “beste behin ere titularrak eman eta erabakiak atzeratzeko proposamena egiteagatik”. Aralarren bozeramaile Aintzane Ezenarrok kritikatu egin du, Diputazioei helarazitako proposamenak etorkizuneko batzorde teknikoetan lantzea iragarri duelako.

“Proposamenak iragarri eta ezer gehiago ez egiteko Lopezen ohiturari jarraitzen dio atzokoak”, adierazi du Aralarren bozeramaileak. Izan ere, “2009an erakunde arteko sei lan talderen eratzea iragarri zuen Lopezek, baina 2010etik ez dira gehiago elkartu. Batzorde teknikoak izendatzea erabakiak atzeratzeko eta luzamendurako estrategia besterik ez da”, iritzi dio Aralarren bozeramaileak.

Dokumentuaren edukiari dagokionez, “orokorkeriaz beteta” dagoela iritzi dio Ezenarrok eta zehaztapenak dituen zati bakarra arlo fiskalarena dela gehitu du. “Arlo horretan, bere proposamenak zeintzuk diren zehazteko bi urte eskatuz egon eta gero,  ikusten dugu errenta altuak ia ez dituela ukitzen, edo ez dituela parekatzen lan-errenten eta kapital-errenten tratamendua, azken horien mesedetan”.

Gizarte laguntzen atalean, etorkizun hurbilean “murrizketa berriak hel daitezkeela” iragarri izana kritikatu du Aralarrek. Izan ere, “laguntzak egokitu’ eta ‘ordenatu’ behar direla dio Lopezek”. Horretaz gainera, “guztiz estrategikoak diren legeen garapena, Gizarte Zerbitzuen legea, erabat geldik izatea” leporatu dio Ezenarrok; are gehiago, ““aurrerapauso zehatzak eman beharrean,  negoziazioak berriz hasteko deia baino ez die luzatu Ahaldun Nagusiei”.

Horregatik guztiagatik, Aralarrek zalantzan jarri ditu Lopezek Ahaldun Nagusien banatutako dokumentuan jaso dituen “balizko proposamen aurrerakoiak garatzeko borondatea eta ahalmena”; izan ere, “urte hauetan Foru Aldundiekin sinatu duen hitzarmen garrantzitsu bakarra EAJ eta H1!-ekin politika publiko guztietan murrizketei bide ematen zien egonkortasun ituna izan da”.