Aralarrek Lehendakariari eskatu dio “topikoak alde batera uzteko eta garapen ereduaren inguruko eztabaida errealari ekiteko”

Eusko Legebiltzarrean eskainitako prentsaurrekoan, Maeztuk Lopez Lehendakariari eskatu dio “azkenaldian errepikatu duen gizarte jasangarriaren moduko topikoak albo batera uzteko”. Legebiltzarkideak onartu du beharrezkoa dela “energia iturrien inguruko eztabaidari ekitea”, baina “lehendabizi ze garapen eredu nahi dugun ere erabaki behar dugu. Horrela jarraituz gero, energia berriztagarriak bakarrik ez, nuklearra, termikoa eta oraindik asmatzeke dauden beste hainbat behar izango ditugulako”, gaineratu du Maeztuk.   

Maeztuk Aralarrek bultzatutako eta Legebiltzarrak onartutako bi ekimen  jarri ditu  adibide moduan, “Gobernuak  bere hitza  ez duela  betetzen "   agerian uzteko . "Ez du 2009 urte bukaeran prestatuta egon beharko lukeen energia eolikoaren arloko plana aurkeztu; eta oraindik ez du Zalloventa  harrobiak Urkiolako Parke Naturalean egiten duen ustiaketa lana geldiarazi”.

Gai horren inguruan Maeztuk azaldu du “PSEk atsedenik gabe” eskatu zuela aurreko legegintzaldietan harrobien inguruko plan partziala  legebiltzarrera ekartzea. “Baina orain, gobernuan daudenean, non  geratu da lehen adierazten zuten kemen hura ? Non dago hainbeste aldiz eskatu zuten plana ? ”. Legebiltzarkideak gogoratu du Idoia Mendiak “bereziki izan zuela jarrera gogorra orduko gobernuarekin, interes ekonomikoen menpeko jarrera leporatuz. Orain, ordea, eurak ari dira modu beran agintzen".

Bestalde, Aralarrek Eusko Legebiltzarrean ekimen berri bat   aurkeztu du, Zalloventako harrobia Urkiolako Parke Naturaleko mugetatik kanpo uzteko. Horretarako Eusko Jaurlaritzari  eskatu dio Urkiolako Parke Naturalaren Baliabide Naturalen Antolamendu Plana aldatzea. “Jakin badakigu Gobernuak, nahi izanez gero, baliabideak  badituela horrelako egoerak ekiditeko.  Bere kabuz egiten ez badu,  besterik ez bada Legebiltzarrak  hala eskatuta egin dezala aginduko diogu"