Hemen zaude: Hasiera › Aktualitatea › Albisteak › Aralarrek Lanbide Heziketarako irakasleek IRALEn lehentasuna izan dezaten eskatu dio Hezkuntza sailari

Aralarrek Lanbide Heziketarako irakasleek IRALEn lehentasuna izan dezaten eskatu dio Hezkuntza sailari

2010/07/23
  • hezkuntza
  • basabe
  • Heziketa
  • Lanbide
Aralarren legebiltzarkide Mikel Basabek, Hezkuntza sailburuari eskatu dio Lanbide Heziketako irakasleak orain baino azkarrago euskalduntzeko lan egitasmoa gauzatu dezala. Aralarrek hainbat galdera egin dizkio Isabel Celaak zuzentzen duen sailari, Lanbide Heziketako irakasleek euskalduntzeari buruz; datuen arabera, 2009-2010 ikasturtean, irakasle bakarrak egiaztatu du Lehenengo Hizkuntza eskakizuna eta bederatzik, berriz, bigarren Hizkuntza eskakizuna. Hala, Lanbide Heziketan ari diren irakasleen %25, hau da, 586k, ez daukate egiaztatuta hizkuntza eskakizuna eta horrek agerian uzten du “lehentasunezkoa” izan behar dela Lanbide Heziketako irakasleen euskalduntzea hobetzeko lan egitasmoa, bai eta IRALEren liberazioetan lehentasuna izatea irakasle horiek.

 

Eskari zehatz bi egin dizkio Aralarrek gaur Hezkuntza sailari: Batetik, behar-beharrezkoa dela lan egitasmo bat Lanbide Heziketan ere irakasle elebidunen kopurua handi dadin, eta handitze hori aurtengo erritmoa baino biziagoa izan dadin. Eta, bestetik, lan egitasmo horrek, epe ez oso luzea izatea lanbide heziketako irakasle elebidunak lortzeko orduan. Hala adierazi du Aralarren legebiltzarkide Mikel Basabek, Legebiltzarrean egindako prentsaurrekoan. Izan ere, Sailak berak Aralar taldeari bidalitako erantzunetan ikus daitekeenez, “aurtengo ikasturtean lehenengo hizkuntza eskakizuna irakasle batek egiaztatu du, eta bigarren hizkuntza eskakizuna, berriz, bederatzi irakaslek egiaztatu dute”.

Basabek, jakina, hamar irakasle horiek zoriondu gura izan ditu, baina, era berean, Hezkuntza sailari egoera hori berbideratzeko eskatu dio. Hala, “gure ikuspegitik Lanbide heziketako irakasleek lehentasunezkoa izan behar dutela IRALEn eta liberazioetan eta, gainera, aztertu egin behar da, funtzionario izan ez arren, urte osoko dedikazioa duten irakasle horiek ere aukera izatea liberazioak lortzeko hizkuntza eskakizunak egiaztatu ahal izateko”. “Hain zuzen ere, uste dugu beharrezkoa dela LHn irakasle elebidun gehiago izatea, gaur egun gizartea are eta elebidunagoa delako eta errealitate horretara moldatu behar garelako”, gaineratu du.