Hemen zaude: Hasiera › Aktualitatea › Albisteak › Aralarrek kritikatu egiten du “euskararen kontrako jarrera baino ez dakartela legebiltzarrera PPk eta UPyDk”

Aralarrek kritikatu egiten du “euskararen kontrako jarrera baino ez dakartela legebiltzarrera PPk eta UPyDk”

2011/06/16
  • eskubideak
  • euskara
  • basabe
Aralarren legebiltzarkide Mikel Basabek erronka luzatu dio Jaurlaritzari eta berau sustengatzen duen talde sozialistari Legebiltzarrean izandako osoko bilkuran, konpromisoa har dezaten etorkizunean euskal herritar guztiak elebiduna izango direla ziurtatzeko beharrezko neurriak hartzera. Saltoki handietan ere hizkuntza eskubideak errespetatzeko dekretua goitik behera aldatzeko gobernuak adierazi duen nahia kritikatu du Basabek, legebiltzarrean eman den eztabaidan. “Egia bada hizkuntzaren askatasunean sinesten duzuela ez daiteke izan behin eta berriz euskararen inposizioaz jardutea”, adierazi die sozialistei.

Legez inposatzen den hizkuntza bakarra gaztelania denez, Basabek legebiltzarreko taldeei proposamena egin die, “inposizioaren kontra daudela benetan erakusteko”: gorteetarako ekimen legegilea gaztelaniaren inposizioa konstituziotik kentzeko. “Izan ere, legez inposatzen den hizkuntza bakarra gaztelania delako. Are gehiago, konstituzioak ez du jasotzen hura ez erabiltzeko eskubiderik daukagunik. Erakutsi egia dela hizkuntzen inposizioen kontra zaudetela eta kendu konstituziotik inposizio hori”, gehitu du Basabek.

Erronka ere egin die: “konpromisoa har dezaten hizkuntza sistema halako moldez aldatzera, non neska-mutikoek derrigorrezko hezkuntza amaitzean gaitasun nahikoa izango duten herri honetako hizkuntza ofizial bietan”. Horretarako, A eredua bertan behera utzi beharko litzatekeela ere gogorarazi die Basabek. “Baina ez zaudete prest hizkuntza eskubideak berma daitezen konpromisoa hartzera, eta ez zaudete prest ere hezkuntza sistemak berma dezan ikasle guztiek hizkuntza ofizial biak ezagutu ditzaten”, leporatu die Basabek.

Hala, Basabek dei egin du “sinets dezagun benetan hizkuntza ofizial bi ditugula, maila bera dutela eta errespetu bera merezi dutela, eta orduan izango duzue bai gobernuak zein berau sustengatzen duzuen taldeok sinesgarritasun pittin bat”.

Basabek 2009ko bagilean eta 2010eko bagilean gai berberaz esandakoa berriro ere irakurri du, argi uzteko “gai zehatza zeinahi izanda ere, benetan ekartzen duzuena gezur berbera dela beti: hemen inposatzen dena euskara dela; funtzionario izateko jakin beharreko hizkuntza euskara dela; urratzen diren hizkuntza eskubideak gaztelaniadunarenak direla; gezurra, gezurra eta gezurra”.