Hemen zaude: Hasiera › Aktualitatea › Albisteak › Aralarrek kritikatu egin du sektore publikoko langileen gain ezarri nahi izatea krisiaren errua

Aralarrek kritikatu egin du sektore publikoko langileen gain ezarri nahi izatea krisiaren errua

2011/11/26
  • maeztu
  • legebiltzarra
  • krisia
Jaurlaritzak sektore publikoan ari diren langileen eskubideak murriztu nahi dituela eta, kritika gogorra egin du Aralarren legebiltzarkide eta koordinatzaileorde Dani Maeztuk, Radio Euskadin gaur goizean. Jaurlaritzak iragarri duen 100 milioi euroko murrizketaren haritik, Maeztuk aditzera eman duenez, “sektore publikoan lan egiten dutenak krisiaren errudun direla aditzera eman nahi da, bizi dugun egoera ekonomikoaren errudunak izango balira legez; erabat injustua iruditzen da hori”.

“Murrizten direnak ez direla eskubideak baizik eta espektatibak direla esan du Jaurlaritzak, baina 100 milioi euroko murrizketez ari bagara, lan eskubideen murrizketez ari gara”, adierazi du Maeztuk. “Eta, gastu publikoaren arrazionalizazioaz ari bagara, ezin da fokua sektore publikoko langileengan jarri”, gehitu du Aralarren legebiltzarkideak. “Eztabaida ez daiteke izan hori; gastu publikoaren arrazionalizazioaren eztabaidak derrigorrean eraman behar gaitu ezbaian jartzera hiriburu bakoitzean aireportu bat egon behar den edo itsasora irteera duen hiri bakoitzak bere portua izan behar duen”, argitu du Maeztuk. Ildo horretatik, Legebiltzarrean talde handiek Hondarribiko aireportua Gipuzkoako ekonomiarentzat ezinbesteko jo izana leporatu die PP, PSE eta EAJri. “Ez da zilegi krisi egoera honetan eztabaidaren fokua sektore publikoan ari diren langileen eskubideetan jarri nahi izatea, injustizia soziala da hori; are gehiago, bizi dugun egoera ekonomikoaren arrazoiekin zerikusirik ez dutenean”.