Hemen zaude: Hasiera › Aktualitatea › Albisteak › Aralarrek Jaurlaritzaren kudeaketa ekonomiko “negargarria” salatu du, eta Agirreri eskatu dio azaltzeko “herritarroi zenbat kostatuko zaigun mailegua”

Aralarrek Jaurlaritzaren kudeaketa ekonomiko “negargarria” salatu du, eta Agirreri eskatu dio azaltzeko “herritarroi zenbat kostatuko zaigun mailegua”

2010/03/16
  • Ekonomia
  • Ezenarro
Aintzane Ezenarro Aralarren Legebiltzar taldeko bozeramaileak gaur goizean ETB2ko ‘Egun on Euskadi’ saioari eskainitako elkarrizketan esan duenez, “Jaurlaritzak gaur eskatu duen 600 milioi euroko maileguak ondo adierazten du zer den gobernu hau, keinuen gobernua, gobernu identitarioa eta arlo ekonomikoan erabat ezgauza, eta Euskadi errealaren beharrei erantzuteko gai ez dena”.

Zentzu horretan, Ezenarrok azpimarratu du “altxortegian soberakina izan arren zorpetu den gobernua da, ‘+ Euskadi 09’ egitasmoarekin egin duen bezala. Aralarretik salatu nahi dugu egitasmo horretako jarduera gehienak ez dira bete, nahiz eta Jaurlaritzak 200 milioi eurotan zorpetu zen”.

 

Gobernu Kontseiluak gaur baimendu duen maileguaren harira, Ezenarrok salatu du “gobernu zentralaren eta Jaurlaritzaren kudeaketa ekonomiko ez-eraginkorraren eta inprobisazioaren ondorioa da”. Aralarren Legebiltzar taldeko bozeramaileak gaineratu duenez, “Ohiko gastura bideratutako 2.000 milioi euroko zorpetzea jasotzen duen aurrekontua onartu zuten abenduan, eta bi hilabeteren ondoren, Ministroen Kontseiluak berak ez du baimentzen zor hori jaulkitzea, eta hori ezin da izan. Abenduan, Erkidegoen Finantzaziorako Legean aldaketa egotea sustatu zuten, ohiko gastua ordaintzeko zorpetzea baimenduz; eta bi hilabete beranduago, alderdi sozialista bera izan da zor horren jaulkipena gelditu duena”.

 

Ezenarrok ohartarazi duenez, “gorabehera hauek, eta beraz, kudeaketa ekonomiko arloko txapuza honek, eragin zuzena izan behar du herritarrengan, eta Agirre jaunari exijitzen diogu bere kudeaketa ez-eraginkorrarengatik egin behar izan den operazio honek zenbateko kostua izango duen azaltzeko”.