Hemen zaude: Hasiera › Aktualitatea › Albisteak › Aralarrek Ingurumen diputatuaren agerraldia eskatu du hondakin organikoen %40 zabortegietara bideratzen diren ala ez azal dezan

Aralarrek Ingurumen diputatuaren agerraldia eskatu du hondakin organikoen %40 zabortegietara bideratzen diren ala ez azal dezan

2011/02/25
  • ingurumena
  • Rebeka Ubera
Aralar batzarkide taldeak Karlos Ormazabalen, Ingurumen diputatuaren agerraldia eskatu du, bereizita jasotzen diren hondakin organikoekin ematen diren urratsen berri eman dezan.

Rebeka Uberak, Aralarren Batzar Nagusietako eledunak, hedabide batean atera diren datuen gaineko kezka azaldu du, Diputazioaren beraren datuetan oinarrituta, baieztatu duelako Gipuzkoan bereizita jasotzen diren hondakin organikoen %40 zabortegietara bideratzen direla. “Foru diputatuaren ahotik entzun nahi dugu hedabide batean azaldutako datu horien gainean egiten duen balorazioa diren ala ez, “azpimarratu du Rebeka Uberak, “hala balitz oso jokabide larri baten aurrean geundekeelako. Iruzur baten aurrean”.

Gipuzkoako Batzar Nagusietako Aralarren eledunak gogorarazi du “Gipuzkoan jende askok ahalegin berezia egiten duela bere etxean hondakinak sailkatzeko gizarte osoarentzat mesedegarri delako. Ahalegin horren ondorioz gero eta hondakin organiko gehiago jasotzen da Gipuzkoan. Oso larria irudituko litzaiguke Gipuzkoako jendartearen parte baten ahalegina bertan behera horrela geratzea”.

Uberak jakinarazi duenez, “jakin nahi dugu informazio horretan jasota dauden datuak egiazkoak diren ala ez eta, horrela balitz, Diputazioak zein urrats eman behar duen erabat onartezina iruditzen zaigun egoera konpontzeko”.