Hemen zaude: Hasiera › Aktualitatea › Albisteak › Aralarrek Gemma Zabaletaren agerraldia eskatu du, elkarrizketa sozialaren mahaiak izango duen garapenaren inguruko informazioa eman dezan

Aralarrek Gemma Zabaletaren agerraldia eskatu du, elkarrizketa sozialaren mahaiak izango duen garapenaren inguruko informazioa eman dezan

2009/07/03
  • Legebiltzarra
  • Ezenarro
Bigarren aldiz aste honetan, Aralarrek Patxi Lopezen gobernuak duen jokabidea salatu du, “Eusko Legebiltzarra alde batera uzten duelako horrelako gauza garrantzitsuetan”. Horregatik, Jaurlaritzako Enplegu sailburuaren agerraldia eskatu du Legebiltzarrean, elkarrizketa sozialaren mahaiak jarraituko dituen ildoak azaltzeko: erabiliko duen metodologia, jarri dituzten epeak eta Jaurlaritzak egin dituen eta egingo dituen proposamen zehatzen inguruan.

Elkarrizketa sozialaren mahaia abiaraziko dela jakin ondoren, Aintzane Ezenarrok, Aralarreko Legebiltzarreko bozeramaleak, Eusko Jaurlaritzaren jokabidea kritikatu du: “Patxi Lopezek ez du proposamen konkreturik egin argazkietan agertzeaz harago. Zentzu horretan, argitu egin beharko du zergatik sortu duen elkarrizketa sozialaren mahaia, Legebiltzarrean informazioa eskaini baino lehenago, eta Eusko Jaurlaritzaren proposamenak ezagutzera eman baino lehenago”. Ezenarrok “gardentasun handiagoa eta komunikazioa” eskatzen dio Lehendakariari, Legebiltzarrean ordezkatuta dauden alderdiekiko. “Aralarren uste dugu mahai horretara ezin daitekeela Lehendakaria agertu orria zuri eta proposamen zehatzik gabe. Bere proposamenak ezagutaraztea exijitzen diogu, sindikatuek azaldutako proposamenetatik harago”, dio legebiltzarkideak.

Bestalde, Aralarrek Rafael Bengoa Osasun Sailburuaren ezohiko agerraldia ere eskatu du, Osakidetzan ustez gertatu diren irregulartasunak azaltzeko. Ezenarrok hori azpimarratu nahi izan du: “beste behin, garrantzitsua iruditzen zaigun gai baten inguruko informazioa komunikabideen bitartez jaso dugu. Hori ez dator bat gobernu berriak gardentasunaren eta elkarrizketaren alde egingo duela adierazitakoarekin".

Ekimena