Hemen zaude: Hasiera › Aktualitatea › Albisteak › Aralarrek Garoñaren itxieraren eztabaida berriro eramango du Eusko Legebiltzarrera

Aralarrek Garoñaren itxieraren eztabaida berriro eramango du Eusko Legebiltzarrera

2012/01/03
  • Garoña
  • Energia
  • Energía nuclear
Alderdiaren helburua da, legegintzaldi honetan hirugarren aldiz euskal ganberak Madrileko gobernuari eskatzea Garoña berehala ixtea; eta era berean, energia nuklearra mix energetikotik kanpo uztearen beharra aldarrikatzea.

Aralarrek gogor gaitzetsi du Espainiako gobernuak Garoña ez ixtearen alde egin dituen adierazpenak eta iragarri du, Burgosen dagoen zentral nuklearraren eztabaida berriro eramango duela Eusko Legebiltzarrera. Alderdiaren helburua da, legegintzaldi honetan hirugarren aldiz euskal ganberak Madrileko gobernuari eskatzea Garoña berehala ixtea; eta era berean, energia nuklearra mix energetikotik kanpo uztearen beharra aldarrikatzea.

 “Egon badira alternatibak gaur egungo energia ereduari, eta eredua aldatzea egun batetik bestera ezin bada egin ere,  energia nuklearra behin betiko baztertu egin behar da berehala”, azaldu du Aralarren legebiltzarkide Dani Maeztuk, “gainera, nuklearrak energia berriztagarrien garapenari oztopo egiten die”, gaineratu du.

Maezturen iritziz, “energia iturri fosilak eta nuklearrak egon dira orain arteko garapen ereduaren eta berau elikatu duen energia ereduaren oinarrian. Fosilak izan dira aldaketa klimatikoaren errudunetako bat eta agerian geratu da nuklearra oso arriskutsua dela pertsonentzat eta ingurumenarentzat”.