Aralarrek etorkizuneko ezker abertzale politikoaren oinarriak ezarri ditu

Etorkizuneko ezkerreko alternatiba abertzalearen oinarriak laburbildu dituzte gaurko agerraldian Patxi Zabaletak eta Jon Abril Aralarreko koordinatzaileordeak:

1. Bide soilik politikoen erabilera. Politikaren erabateko lehentasuna bide zibiletatik, beste inolako baldintzarik gabe. Ezker abertzale politikoa mugimendu zibila izanen da. Soilik zibila.

ETAren aroa bukatua dago. ETAk bukaera duina izatea ona litzateke, Euskal Herriarentzat, gizartearentzat, bakearentzat, presoentzat, biktimentzat, eta batez ere, ezker abertzalearentzat.

Horretarako, ETAri eskatzen diogu aldebakarreko etena, ordain politikorik gabeko etena eta behin betiko etena.

2. Egitura demokratikoa lehenetsi. Ezker abertzale politikoak abangoardiaren eta lidergoaren xedeak eta helburuen politika maximalistak baztertu behar ditu. Lehia politikoan indar politiko bat gehiagoren papera onetsi behar du, horretarako, barne egitura demokratikoa osatuz. Ezker abertzale politikoak mugimendu zabala izan behar du. Demokratikoa bere barnean, eta bere jokaeretan.

3. Ezker abertzaleak indar anitza izan behar du. Barne egitura guztiz demokratikoa duena. Zibila ez ezik, ezker abertzalea zabala baita. Ezkerreko abertzaleen elkarlana sustatuko dugu, beti ere elkar errespetuan oinarrituz, ABrekin dugun harreman eredua aintzat hartuta. Aniztasuna normaltasunez bizi beharrekoa da, bestea ukatu gabe. Herri honetako aniztasunak, lehenik, bestearen aitortza eskatzen du, desberdin pentsatzen duen jendea badagoela aitortu eta horregatik inor ukatu eta baztertu gabe jokatzea.

4. Gauden eta dugun egoeratik abiatuta saiatuko gara lehia politikoa egiten. Ipar Euskal Herria, Nafarroa eta EAE erabaki esparruak direla onartuta eta ibilbide edo estadio autonomikoa aintzat hartuta.

5. Europako Batasuna onartu. Bere gabezia eta hutsune politiko eta ekonomiko guztiekin, eta defizit horiek arbuiatuz eta ahaztu gabe bada ere, zehazki onartu. Euskal Herria Europako nazio bat da. Europaren baitan eta barruan lortu nahi dugu independentzia eta horrek izan behar du Ezker Abertzalearen xede politiko zehatza eta agerikoa.

“Ezker abertzalean dauden bi sentsibilitateak (Aralar eta AB batetik, eta Batasuna bestetik –eta, agian, beste talde edo indar politiko batzuk ere bai-) etorkizuneko ezker abertzale politikoaren esparru horri begira gaude. Begira bai, baina ez esperoan, Euskal Herriak ezin duelako itxaron, bakearentzat, beti, beranduegi delako”, esan du Zabaletak.

Era berean, gaur aurkeztutako oinarriak dira Aralarren etorkizuneko apustua, eta horren harira, gogoan izan du Batasunak asteburu honetan egin duen adierazpena. “Ezker abertzaleko beste sentsibilitateak asteburuan aurkeztu duen dokumentua modu positiboan baloratu nahi dugu, Zutik Euskal Herria agirian bildutako asmoak berretsi dituztelako. Urrats bat da ETAri eskaera egitea eten iraunkorra eman dezan, aintzat hartu beharrekoa”.

“Apustu hau azken muturreraino eramango dutenaren esperantza dugu, eta herri honetako bortizkeriaren amaiera lehenbailehen ikusi ahal izanen dugunaren itxaropena dugu”, gaineratu du Zabaletak. “Aralarrek orain hamar urte eman zuen urrats hori, eta hortaz, orain pauso hori emateko prest direnei ongi etorria eman nahi die Aralarrek, positiboa eta beharrezkoa delako”, nabarmendu du.