Hemen zaude: Hasiera › Aktualitatea › Albisteak › Aralarrek Espainiako gobernuari ESKaren txostenari muzin egiteko eta emandako hitza betetzeko eskatzen dio

Aralarrek Espainiako gobernuari ESKaren txostenari muzin egiteko eta emandako hitza betetzeko eskatzen dio

2009/06/06
  • Garoña
  • Ingurumena
  • energia nuklearra
Espainiako Segurtasun Kontseiluak Santa Maria de Garoñaren jardunak aurrera jarraitzeko oniritzia emango du. Erabakiak ez gaitu batere harritzen, Garoñaren etorkizuna aurretik erabakita dagoen susmoa baitaukagu. Espero genuen arren, Aralar, beste hainbat herritar eta eragileren antzera, kezkatuta dago ESK kaleratuko duen txostenean jasotakoarekin.

Espainiako Gobernuak hilabetea dauka orain Garoñaren jarduera beste hamar urtez luzatu dezakeen erabakitzeko. Hori dela eta, Aralarrek estatuko gobernuari eskatzen dio albo batera utz dezala ESK erakundeak kaleratutako txostena eta behin eta berriro adierazi duena bete dezala: hainbeste hauteskunde programetan adierazitakoari eutsi eta energia nuklearra energia seguru, garbi eta merkeagoen alde egin dezala. Aralarren legebiltzarkide Dani Maezturen esanetan, "PSOEk ez luke kontraesanetan erori behar eta Zapaterori exijitzen diogu hainbat aldiz egindako adierazpenetan esandakoa bete dezala, garapen jasangarria eta energia berriztagarrien aldeko politika egin dezala".

Espainiako Red Eléctrica Española erakundearen arabera, apirila eta maiatzean, energia kontsumoa murriztu egin da krisiaren eraginez, %11 eta %8, hurrenez hurren. Horri eutsiz, 40 urte beteko dituen zentrala ixtearen alde gaude. Kontutan hartu behar dugu, Garoñako zentralak kezkatuta dituela inguruko biztanleak (urte betean 9 istripu izan ditu). Horren harira, energia kontsumoa murriztearen alde gaudela gaineratzen dugu eta horretarako sentsibilizazio kanpainak egitea proposatzen dugu. Etorkizunak benetan garbiak eta berriztagarriak diren energien alde egitean datza.