Hemen zaude: Hasiera › Aktualitatea › Albisteak › Aralarrek diputatu eta senatariei eskatu die aukera hau baliatu dezatela Alderdien Lege “demokratikoa, modernoa eta irekia” ezartzeko

Aralarrek diputatu eta senatariei eskatu die aukera hau baliatu dezatela Alderdien Lege “demokratikoa, modernoa eta irekia” ezartzeko

2010/03/27
  • Patxi Zabaleta
  • Alderdien Legea
  • Jon Abril
Espainiako Gobernuak Hauteskundeetarako Lege Organikoa gogortzeko proposamenaren aurrean, Patxi Zabaleta Aralarreko koordinatzaile nagusiak esan du horren atzean “ideiak kriminalizatzeko” asmoa dagoela. Era berean, salatu du “PSOEk beste behin makurtu egin dela Mayor Orejaren, eskuin muturraren eta Alderdi Popularraren” exijentzien aurrean.

Gaur goizean, Iruñean, Jon Abril Aralarreko koordinatzaileordearekin batera egindako agerraldian azpimarratu duenez, “lege aldaketak eragin kaltegarria izango du elkarbizitzan eta normalizazio sozialean; gainera, legea ezarriko zaien pertsonen gainean eskubide murrizketa argi eta garbia egingo da”.

Lege aldaketaren aurrean “kontrako jarrera argi eta irmoa” azaldu ondoren, esakera zuzena egin die diputatuei eta senatariei: “Legea ez dezatela zentzu murriztailean moldatu, eta gainera, balia dezatela aukera hau ideiak kriminalizatuko ez diren lege demokratikoa, modernoa eta irekia ezartzeko, XXI. mendeko Europak horixe eskatzen duelako”.

“Orain egun batzuk, Mayor Orejak ahoa ireki eta bere ohiko astakeriak esan zituenean, sektore demokratiko osoa kontra jarri zitzaion; baina, azkenean, itxurakeria baino ez zen izan. Ondoren, Rajoy etorri zen, eta babestu egin zuen, eta azkenean, Rubalcabak obeditu egin du”, esan du Zabaletak. Nabarmendu duenez, “demokraziaren adulterazio honen onuradunak beti dira UPN, PP eta eskuina, lehendakaria Lopez abizenekoa izan arren”.

“Hauteskundeen ondoren, eta indarkeria ez kondenatzeagatik norbait ilegalizatzea ikaragarrizko astakeria demokratikoa da, eta gainera, UPN edota PP bezalako alderdiak ilegalizatzeko aukera zabaltzen du, gure gizartean bizirik dagoen genozidio frankista eta bere krimenak kondenatzeko ez direlako gai izan oraindik”, esan du, bere aldetik Jon Abrilek. “Dena dela, edozein alderdi ilegalizatzearen kontra gaude gu”, erantsi du.

Aralarreko koordinatzaileordeak defenditu duenez, “segurtasun egonkorra, igualitarioa, demokratikoa eta benetakoa ideologiari mugak ezartzen ez diona eta pertsona guztien berdintasuna aitortzen duena da. Herritarrek pertsona batzuk bere ordezkari izateko aukeratu baditu, pertsona dira beren ordezkariak eta ez beste batzuk. Kondenatzeagatik edo ez kondenatzeagatik edo bestelako irizpide ideologiko batengatik ezin da etorri gero murrizketarik, horrek herritarrek libreki aukeratutako ordezkaritza adulderatzea dakarrelako”.