Aralarrek dio Sanz eta Lopezen arteko bileratik ezin ondoriozta daitekeela harremana normalizatua dela

Aintzane Ezenarrok, bere aldetik, esan du atzoko bilera eta argazkia ez dela sinesgarria. “Normaltasun eta esku-hartzerik gabeko harremana izango dela diotenean, aurretik esku-hartzeak egin direla adierazi nahi izan dute, orain arteko harremanik eza arrazoitzeko, baina inolako adibiderik jarri gabe. Horregatik ez da sinesgarria atzoko bilera. Ukazioaren bidez izaera politikoa eman dio”.

Zentzu horretan, alderdi sozialistaren jarrera kritikatu du, “pasa delako Hego Euskal Herriaren batzea eskatzetik harreman normalizatua aldamenean bizi diren bi bizilagunen arteko harremana dela harreman normalizatua esatera”.

Azpimarratu duenez, “EAE eta Nafarroaren arteko harremana bizilagunen arteko elkarlana baino askoz gehiago da. Elementu objektiboak zein politikoak daude, baita ordenamendu juridikoan bertan, harreman hori sakontzeko”.

Hala, bi erkidegoen artean elementu objektibo asko komunean dituztela nabarmendu du. “Herri bat gara, eta elementu identitarioan bat egiten dugu. Kultura eta hizkuntza komuna dugu, eta horien garapenean elkar hartuta aritu behar dute EAEko zein Nafarroako agintariek. Baina orain arte Nafarroako agintariek betoa ezarri izan diote harreman horiei”.

Baina hortik haratago, harreman horrek “gizartearen gehiengoaren borondateari” erantzuten diola adierazi du Ezenarrok. “EAEko herritarren gehiengoak, alderdi politikoen gehiengoak, eta Nafarroako bigarren indar politikoak, Nafarroa Baik, abertzalegoak oro har, harreman politiko estuagoa eskatzen dute Nafarroako eta Euskal Autonomia Erkidegoko administrazioen artean. Bi erkidegoetako bizilagunek dituzten harreman normalizatu eta ohikoak administrazioen artean ere egotea eskatzen du Hego Euskal Herriko herritarren gehiengoak”.

“Horregatik”, gaineratu du, “Aralarretik eskatzen dugu erabaki esparru bakoitza errespetatzetik, egitura egonkor bat ezartzea harreman sozial, kultural, politiko eta instituzionalak gizarteak eskatzen duten mailakoak izateko”.