Hemen zaude: Hasiera › Aktualitatea › Albisteak › Aralarrek dio Bateraguneko kideak auziperatu izana gehiegikeria dela eta baketik aldentzen gaituela

Aralarrek dio Bateraguneko kideak auziperatu izana gehiegikeria dela eta baketik aldentzen gaituela

2010/01/26
  • Batasuna
  • Ezenarro
Audientzia Nazionaleko epaile Baltasar Garzonek Altsasuko Adierazpena bultzatu zuen Bateragune kolektiboko kideak inputatu izana gehiegikeria eta baketik aldentzen gaituen neurria dela salatu du Aralarrek. Aintzane Ezenarro Aralarreko legebiltzarkideak gaur goizean Euskadi Irratian adierazi duenez, “kartzelan egon behar badira, ze diferentzia dute hauek eta Altsasuko Adierazpena politikoki defendatzen dutenen artean? Badirudi barne eztabaida baten daudela eta eztabaida horretan ponentzia ezberdinak daudela, baina Altsasun berretsi zuten ponentzia zentrala izan da, hain justu, hauek egin dutena. Beraz, zergatik daude batzuk kartzelan? Zein argumentu juridiko dute pertsona horiek kartzelan izateko?”

“Atxiloketa hauek gertatu zirenean”, gogoratu du, “zenbaitzuk esan genuen politika egiteko asmoa zutelako izan zirela atxilotuak, eta Garzonen tesia bere osotasunean babestu zuen alderdi sozialistak. Hilabete batzuen ondoren, Patxi Lopez lehendakariak berak ere esan du talka dagoela ezker abertzaleko sentsibilitate horretan, politika egin nahi zutenen eta ETAren artean. Hori pentsatzen badu, zaharkitua geratu da Garzonen autoa eta orain ezagutu dugun auziperatzea”.


“Jakin nahiko nuke”, jarraitu du Ezenarrok, “bai Egiguren eta baita Lopezek zer esaten duten; ezin dena da, era horretako kontraesanetan ibili lehendakari izanda; ezin da gizartea hola nahastu eta pertsonak hain arinki kartzelara eraman eta besterik gabe hor utzi”. Aralarreko legebiltzarkidearen hitzetan, “Lopez bera izan da esan zuena hauek ETAri aurre egiten ari direla eta Egigurenek are gehiago esan zuen: bataila irabazi egingo dutela esan zuen. Izugarrizko arduragabekeria iruditzen zait  horrela aritzea, eta Lopezek bere iritzia eman eta argitu beharko luke”.

“Garzon ari da esaten edozein ari dela ETAren agindupean eta argumentu hori nahikoa izan da, edozein frogarik gabe, jendea kartzelaratzeko. Ez gara ari datozen kasu berrietaz; izan ere, gogoratu behar da makrosumarioak egin direla aitzakia horrekin berarekin”, salatu du.