Aralarrek azpimarratu du "Memoriaren Eguna ospatzen hasi behar dugula indarkeria guztien errekonozimendua egin gabe dagoela"
- Giza eskubideak
Oxel Erostarbe, Inaxio Garro eta Diego Gastañares (Elgeta, Aretxabaleta eta Asparrenako alkateak, hurrenez hurren) Aralarren alkateek, Memoriaren eguna ospatzeko dokumentazioa jaso dutela eta, salatu dute “Memoriaren eguna ospatzen hasiko garela, indarkeria guztien errekonozimendua egin gabe dagoela”. Hiru alkateen iritziz, “errekonozimenduaren aldia itxi gabe dagoenean, ezin gara memoriaren aldira pasatu. Biktimek memoriarako duten eskubidea etorriko bada euren oinarrizko eskubideak aitortzen zaizkienean izango da, hau da, egia, justizia eta errekonozimendua aitortzen zaienean”.
Errekonozimenduaren lehen aldi hori ixteko, barkamen eskea eta errekonozimendua biktima guztiei eskatu eta aitortu behar zaie. “Biktima guzti-guztiak izan behar dira, eta ez bakarrik Terrorismoaren Biktimekin Elkartasunerako Legean aitortzen direnak”, azpimarratu dute Aralarreko alkateek. Zentzu horretan, gogoratu dute motibazio politikoko eta polizia gehiegikerien biktimen inguruko txostena Legebiltzarrean aurkezteko konpromisoa betetzeke daukala oraindik Jaurlaritzak.
Legebiltzarrak azaroaren 10a izendatu zuen Memoriaren Eguna, gobernuak, hiru Batzar Nagusiek eta Eudelek hala adostu ondoren.