Hemen zaude: Hasiera › Aktualitatea › Albisteak › Aralarrek Abetxukoko tranbiaren egitasmoari aurkako iritzia eman dio Legebiltzarrean

Aralarrek Abetxukoko tranbiaren egitasmoari aurkako iritzia eman dio Legebiltzarrean

2010/03/15
  • Maeztu
  • Garraio Saila
Gasteizko udalak eta Arabako Foru Aldundiak hitzartu duten proiektuaren aurka alegazioak aurkeztu ditu Aralarrek. Alderdiak Jaurlaritzari leporatzen dio urratsak eman izana, Eusko Legebiltzarrari informazioa eskaini aurretik.

Abetxukoko tranbiaren harira, Udalaren eta Aldundiaren arteko egitasmo hitzartuaren aurkako jarrera aurkeztu du Aralarrek Eusko Legebiltzarrean. Ostiralean bukatu zen egitasmoaren aurkako iritzia emateko eta alegazioak aurkezteko epea. “Lehen auzoak onartu ez zuen proiektu bera aurrera eraman nahi da, auzokideei beharrezkoa den informazioa helarazi barik, beraien iritziaren kontra. Gainera auzoko bizilagunak esaten dute eragozpen handiak pairatuko dituztela obrak eta trazatu berria direla eta”, adierazi du Aralarren legebiltzarkide Dani Maeztuk.

Alderdiak kritikatu du hitzarmena bera Euskal Herriko Aldizkari Ofizialean agertu izana, Eusko Legebiltzarrak informazio bera izan aurretik. “Gainera hitzarmenaren testutik aparte ez zaigu beste inolako informaziorik heldu”, gaineratu du legebiltzarkideak, “eta eraikitze proiektua, eta proiektu honentzako, 3/98 ingurumena babesteko lege orokorraren arabera beharrezkoa den inpaktu anbientaleko ebaluazioari dagokion dokumentazioa ezinbestekoa dela deritzogu, bere osotasunean proiektua aztertzerako orduan eta iritzi bat ematerako orduan”. 

Maeztuk Abetxuko herritarrek dagoeneko egitasmoaren aurkako iritzia aurkeztu diotela gogoratu du, bere horretan dagoen moduan. “Herritarren iritziari kasu egitea eta Eusko Legebiltzarrak esaten duena kontutan hartzea” eskatu du legebiltzarkideak.